Rashiid Sulub: Shaqsiyadda Somaliland ee Sannadka 2012

By: Cabdirashiid Cali Sheekh, Jamhuuriya Copy Editor, Hargeysa, Somaliland.

Guud ahaan caalamku waxa uu ka siman yahay in dhammaadka sannad kasta la soo bandhigo shaqsiyaad si gaar ah loogu maamuuso waxqabadyada danta guud ugu waaweyn ee ay dalalkooda iyo dadkooda ku soo kordhiyeen sannadka 2012.

Haddaba, Jamhuuriyadda Somaliland oo dalalka adduunka la wadaagta qiimaynta shaqsiyaadka waxtarka muuqda ku soo kordhiyey waddamadooda, waxa aan cidna dafiri Karin in muwaaddin Rashiid Sulub Caalin mutaystay shaqsiyadda Somaliland ee sannadka 2012-ka sababahan dartood:

Asbaabaha muwaaddin Rashiid Sulub ku mutaystay inuu noqdo shaqsiga ugu mudan sannadkan sii galbanaya ee Somaliland waxa xuddun u ah abuurista iyo hirgelinta barnaamijkii ugu ballaadhnaa dalka ee arrimaha danta danta guud oo lagu qiimaynayo 100 qof oo dadkooda iyo dalkooda wax weyn ku soo kordhiyey 21-kii sannadkood ee Jamhuuriyadda Somaliland xorriyadda haysatay, kuwaas oo munaasibad heer qaran ah lagu abaalmarin doono horraanta sannadka cusub ee 2013.

Sidoo kale, muwaaddin Rashiid Sulub Caalin waxa uu sidiiba hore ugu caan-baxay ka shaqaynta arrimaha danta guud ee bulshada Somaliland, isagoo maalkiisa iyo waqtigiisa qaaliga ah u hura sidii uu wax ugu qaban lahaa dadka tabaalaysan, waxaannu si joogto ah u caawiyaa meelaha dhibaatooyinka ugu badan jiraan ee aanay dadweynaha badankoodu dareensanayn, gaar ahaan maxaabiista ku jira xabsiga dhexe ee Hargeysa, Cusbitaalka Qaaxada iyo Cusbitaalka Dhimirka ee caasimadda iyo weliba inuu sannad kasta bisha barakaysan ee Ramadaan maalin kasta afarta kontorool ee Hargeysa afur ugu diyaariyo ilaa 200 qof.

Haseyeeshee, hawlahaas samafalka ee Ilaahay ku ilhaamiyey oo uu naftiisa uun ku raalligeliyo, balse aannu magac iyo manfac midna ka doonayn, waxa uu sannadkan ku sii daray abuurista barnaamij qaran aad iyo aad u baaxad weyn oo loogu magac-daray ‘Qiimee Qofkaaga Qiimaha Leh si aad Qiimo u Yeelato,’ k aas oo uu hirgelintiisa gelisay juhdi xooggan iyo hanti gaadhaysa boqollaal kun oo dollar oo aanay jirin cid ka caawisay, isagoo ujeeddada ugu weyn ee uu ka leeyahay tahay inuu dalkiisa iyo dadkiisa uga tago dhaxal-reeb jiilba jiilka kale ka sii dhaxlo oo lagu qiimaynayo, laguna abaalmarinyo qof kastoo wax muuqda ka qabtay danta caamka ah ee la wada leeyahay, si ummaddu ugu tartanto wanaaga iyo horumarka.

Barnaamijka Qiimee Qofkaaga oo uu maalgelintiisa iyo hirgelintiisaba ku keliyeystay muwaaddin Rashiid, isla markaana ah kii ugu horreeyey noociisa ee dalka laga fuliyo oo ay codbixin guud dadweynaha reer Somaliland ku soo dooranayaan 100-ka shaqsi ee ay u arkaan inay yihiin qaar dalkooda iyo dadkoodaba wax weyn ku soo kordhiyey 21-kii sannadkood ee la soo dhaafay, kaas oo haatan maraya gebagebo, iyadoo sida qorshaha barnaamijku yahay guulaystayaasha doorashadaas oo ay in ka badan 10 kun qof si xor ah codkooda uga dhiibteen lagu abaalmarin doono munaasibad heer qaran ah oo badhtamaha bisha February ee sannadka 2013-ka loogu qabanayo caasimadda Hargeysa.

Barnaamijkan oo ah mid aad u culus oo ay adagtay in qof keliya amma kooxo u babac-dhigaan hirgelintiisa, ayaa muwaaddin Rashiid Sulub kelidii u birdhigay, iyadoo xataa uu qiimayntan ku mutaysan lahaa tamartii la yaabka lahayd iyo dhaqaale xad-dhaafa jeebkiisa ah oo u adeegsaday sidii uu bulshada reer Somaliland uga dhaadhiciyey qiimaha iyo muhiimadda barnaamijkani xambaarsan yahay, isagoo hawshaas aadka u weyn u isticmaalay dhammaan qaybaha kala duwan ee warbaahinta dalka.

Sidaa darteed, marka la qiimeeyo dhammaan dhacdooyinka dhinaca arrimaha danta guud ee Somaliland ka hirgalay sannadkan 2012-ka ma jirto, mana muuqato tallaabo ka muhiimsan amma ka miisaan weyn oo hal muwaaddin kelidii sida Rashiid Sulub Caalin juhdi iyo dedaal aan damac kale wehelin oo intaas le’eg geliyey hirgelinta barnaamij dhaxalgal ah oo weligii ku suntanaan doonaan taariikhda Jamhuuriyadda Somaliland oo sannad kasta lagu abaalmarinayo xubno loo aqoonsan doono shaqsiyaad qaran oo ku dayasho mudan.

Si kastaba ha ahaatee, muwaaddin Rashiid Sulub oo marar badan caddeeyey in aannu haba yaraatee dan shaqsi iyo mid dhaqaale toona ka doonayn hirgelinta barnaamijka uu dalkiisa iyo dadkiisa wanaagga ugu daah-furay, sidoo kalena isaga iyo hawlwadeennada tirada badan ee kala shaqeeya hawshaas aadka u ballaadhan aanay ka mid ahayn 100-ka qof ee dadweynuhu codkooda ku soo dooranayaan ma jirto cid ka mudan amma kaga masuugi karta in loo aqoonsado shaqsiyadda Somaliland ee sannadka sii dhammaanaya.

Geesta kale, anigoo ah qoraaga maqaalkan waxaan akhristayaasha u caddaynayaa in aannu Rashiid Sulub Caalin waxba ka ogayn, igana dalban qorista maqaalkan, balse ay ka suxufi ahaan iila muuqatay in aan qormadan kooban qallinkayga ku dhiirrigeliyo muwaaddinkaas oo aan aaminsanahay in aannu jirin shaqsi kale oo ka mudan amma uga dedaal badnaa arrimaha danta guud ee Somaliland oo hawl baaxaddaas le’eg qabtay sannadka 2012.