Komishanka oo Caawa Liiska 25 Xubnood G/Deegaanka Hargeysa u gudbiyay Maxkamadda

Hargeysa (Somaliland.Org)-Gudoomiyaha Komishanka Doorashooyinka ee Degmada Hargaysa Siciid Jaamac ayaa caawa mar kale waxa uu shaaca ka qaaday dib u sixidii ay ku sameeyeen natiijadii doorashada ee Caasimada Hargaysa isla markaana ay u gudbiyeen Maxkamada Gobolka Maroodi jeex,oo ansixin karta natiijadan marka ay ku qanacdo.

Gudoomiyaha Komishanka Doorashooyinka ee Degmada Hargaysa waxa uu sheegay in natiijadan ay dib u sixida ku sameeyeen aanay waxba ka badalin saamiga ay Xisbiyada iyo Ururada Siyaasadu kala heleen.

Guddoomiyuhu waxa uu cadeeyay in waxa keliya ee is bedelay ay tahay laba Murashax oo ay markii hore shaaciyeen inay ku soo baxeen doorashada oo ay dib u tirintii danbe ku saxeen isla markaana ay soo saareen cidii ku soo baxday. Kuwaasi oo ka soo kala jeeda ururadda RAYS iyo Dalsan.

“Waxaanu 6-dii Bishan ku dhawaaqnay natiijadda doorashada deegaanka Hargeysa, haddana 8-dii bishan ayaanu ogaanay in tiradii macluumaadkii Faro-weyne laba qorantay. markaa waxaanu komishan ahaan ka saarnay tiradii laba jeer qorantay. waxaanan maanta u gudbinay Natiijadii maxkamadda Gobolka Hargeysa waxaanay marka ay ku qanacdo qaraar lagu camal falo ka soo saari doonta,”ayuu yidhi Guddoomiyaha Komishanka degmadda Hargeysa.

Waxa kale oo uu beeniyay hadalo ka soo yeedhay qaar ka mid ah murashaxiintii hadhay oo warbaahinta ka sheegay in xisbiyadda iyo ururadu ay soo xuleen saamiga xildhibaanadda ay ka heleen degmadda Hargeysa.

“Ma Jirto Xildhibaano ay soo xusheen axsaabtu iyo xildhibaano la is weydaariyay midna,”ayuu yidhi Siciid Jaamac.

Magacyada Xildhibaanada Cusub ee Golaha Deegaanka ee Komiishanku ku dhawaaqeen,waxay magacyadoodu kala yihiin.

1.Axmed Cali Haybe.
2. Khaalid Cabdi Cawad Abyan.
3. Mustafe Cismaan Daahir.
4 Maxamed Warsame Caalin Timacade.
5.Cabdiqani Yuusuf Cabdillaahi Ina Macalin.
6. Cabdillaahi Aadan Cali Cabaas.
7. Cabdirisaaq Faarax Xasan Qawdhan.
8. Hanad Xaashi Axmed Caydiid .
9. Cabdiraxmaan Maxamuud Caydiid Soltelco.
10. Cismaan Xasan Faarax Waxar.
11. Eng. Yuusuf Warsame Siciid.
12. Axmed Siyaad Muxumed.
13. Cabdi Cali Yuusuf.
14. Axmed Daahir Axmed Magan.
15. Saleban Daahir Cabdillaahi Dogox.
16. Cabdillaahi Aw Aadan Maxamed.
17. Cabdillaahi Siciid Faarax.
18. Deeq Ducaale Cismaan.
19. Ismaaciil Jaamac Xirsi Cabdi.
20. Cabdicasiis Aadan Habane.
21. Ilyaas Aw Xuseen Jaamac.
22. Maxamed Aw Aadan Weyrax.
23. Khadar Ibrahim Axmed Maax.
24. Cabdicasiis Maxamed Xaashi.
25. Maxamed Cabdi Aadan.

Dhawaqan Komishanka degmada Hargaysa ayaa ka danbeeyay kadib markii ay Maxkamada Gobolka Maroodijeex, dib ugu celisay Komiishanka Doorashooyinka Natiijadii ay soo saareen 6dii bishan aynu ku guda jirno ee 2012.

Cumar Maxamed Faarax
Somaliland.Org/Hargeysa