Dalladda SONYO Oo Tallooyin u Jeedisay Dhalinyaradda Ku soo baxday Goleyaasha deegaanka

Hargeysa (Somaliland.Org)- Dalladda ururada dhallinyarada Somaliland ee SONYO iyada oo ka duulaysa natiijooyinka ka soo baxay inta badan gobolada iyo degmooyinka dalkeena Somaliland in badana isha ku haysay natiijada ay doorashooyinkan ka keeni doonaan murashaxiintii dhallinyarada ahayd ee faraha badnayd ee u taagnayd golayaasha deegaanka waxaanu aqoonsanay in dhalinyaro aad u tiro badani ka soo baxeen imtixaankii adkaa ee ay galeen iyaga oo kalsooni badan ka helay guud ahaan shacabka.

Aniga oo ku hadlaya magaca guud ee dhallinyarada Somaliland waxaan halkan hambalyo iyo bogaadin aad u ballaadhan uga soo jeedinayaa murashaxiintii dhallinyarada ahayd ee ka soo kala baxay dhammaanba toddobaddii Urur/Xisbi ee tartanka doorashooyinka golayaasha deegaanka galay waxaananu sidoo kale hambalyo ballaadhan u soo jeedinaynaa shacabka Somaliland ee sida qiimaha iyo qaayaha badan u gutay waajibkoodii qaranimo ee ay doorashooyinka ugu dareereen uguna codeeyeen sida habsamida leh ee nabad gelyadu ku dheehan tahay.

Iyada oo ay muuqato natiijada ka soo baxday dadaalkii ballaadhaa ee aynu u gallay wax ka badalkii xeerka sharci ee dabar ka furista ka qayb galka siyaasadda ee dhallinyarada, ILAAHAY-na (SWT) suurta galiyay in dhallinyaro fara badani u soo baxeen golayaasha deegaanka waxaa lagama maarmaan ah haddii aynu dhallinyaro nahay in aynu fulino ballan-qaadkii aynu dadkeene iyo dalkeena u samaynay ee ahaa in aynu aqoonteena, dadaalkeena iyo tamarteena wax ugu qaban doono dalka, waa in aynu ka dhabaynaa taasi. Waxa kale oo lagama maarmaan ah si aynu guulahaasi siyaasadeed ee aynu ku doonayno in aynu dadkeena wax ugu qabanaa waa in aynu ku dadaalaa sidii ay dhallinyaradu isugu soo taagi lahaayeen maayarada degmooyinka dalka oo macnaheedu tahay in ay hammigooda wax badan halkaasi kaga badali karaan.

Xubnaha Golayaasha deegaanka ee soo baxay waxaanu ku boorinaynaa in xubnaha dhallinyarada ah lagu taageero buuxinta jagooyinka maayarada dalka, taasi oo wax weyn ka tari doonta dhammays tirka hayaanka dhallinyaradu u soo gashay in ay dadaalkooda iyo waxqabadkooda u gudbiyaan dadkooda iyo dalkooda.

Dalladda dhallinyarada Somaliland ee SONYO iyada oo ogsoon muhiimadda golayaasha deegaanku u leeyihiin dalka waxa ay xubnaha la doortay u soo jeedinaysaa in ay shacabka soo doortay ee u han weyn sida ugu wanaagsan ugu shaqeeyaan danta caamka ahna wax walba ka hor mariyaan iyaga oo awoodda saaraya horumarinta adeegyada shacab ee degmooyinka dalka.

Ugu dambayn, waxa ay dalladda dhallinyarada Somaliland ee SONYO si gaar ah ula dardaarmaysaa murashaxiinta dhallinyarada ah ee soo baxay oo ay ku waaninayso in ay xaqiijin karaan ballan qaadkii dhallinyaradu ku doonaysay in talada dalka wax laga siiyo taasoo haddii ay ku fashilmaan Ilaahay kama yeelee keeni doonta in shacabkeena intiisa kale ka aamin baxaan ballan qaadkii aynu hore u samayn jirnay. “Barbarkay Ka Baxdaa Waa Bakaylo Qaleen”. Aan u midawno deegaamada dalkeena oo horumar sameeya.

Guddoomiyaha Dalladda SONYO
Md. Axmed Cabdi Wacays