Xukuumadda Somaliland Oo Xidhay Dhammaan Xuduudaha Dalka

Hargeysa (Somaliland.Org)- Xukuumadda ayaa shaacisay inay muddo 24 saacadood ah ay xidhay dhammaan xuduudaha Somaliland, sidaasna waxa sheegay Wasiirka Arrimaha gudaha Somaliland Maxamed Nuur Caraalle (Duur).

“Laga Bilaabo 4:00 galabinimo ee maanta illaa 8:00 cawaysnimo ee habeen dambe waxaanu xidhnay dhammaan xuduudaha Somaliland. Lamina ogala in lagu soo galo Gaadiid iyo Lugtoona maadama oo ay doorashadda Goleyaasha deegaanka dalka ka dhacayso,”ayuu intaas raaciyay Wasiirka Daakhiligu.


Wasiir Duur waxa kale oo uu sheegay inay sidoo kale maalinta Arbacadda ee beri ay mamnuuc tahay dhaq-dhaqaaqa Gaadiidka.

“Waxaan leeyahay dadku ha dhawraan sharciga doorashadda, gaadhiga aan siday lambarka Komishanku bixiyay ma socon karo,”ayuu yidhi Wasiirka Daakhiligu.

Wasiirka Daakhiligu waxa kale oo uu ka hadlay shaqaaqo maanta ka dhacday magaaladda Ceerigaabo oo dadweynaha magaaladaasi ka cabanayeen goobaha codbixinta oo ku yar, waxaanu ku dooday in ay ka garaabayaan saluugaasi isla markaana ay rajaynayaan in loo helo goobo dheeraad ah.

Wasiirka Arrimaha Gudaha Somaliland waxa uu u soo jeediyay dadweynaha inay ilaaliyaan nabad-gelyadda oo ay si nabad-gelyo ah codkooda u bixiyaan.

Cumar Maxamed Faarax
Somaliland.Org/Hargeysa
cumarmfaarax@hotmail.com