Salaadiin Ka Dareen Celiyay Kulankii Madaxweyneyaasha Somaliland Iyo Somalia

HARGEYSA (Somaliland.Org)- Suldaanka Guud ee beelaha Somaliland Suldaan Maxamed Suldaan C/Qaadir iyo Suldaan Xuseen Xaaji Cabdi Cabdilaahi oo ka mid ah madax-dhaqameedka gobolka Hargeysa, ayaa war-saxaafadeed wada jir ah oo ay caawa soo saareen waxay ku soo dhaweeyeen kulankii maanta Madaxweyneyaasha Somaliland iyo Soomaaliya ku dhex maray dalka Imaaraadka carabta.

Labadan Suldaan sheegeen in wada hadaladan labada dal u bilaabmay ay ka rajaynayaan inay ka soo baxaan natiijooyin wanaagsan. War-saxaafadeedka Salaadiintaasina wuxuu u dhignaa sidan:-

“Waxaanu soo dhawaynaynaa wada hadalka Madaxweyneyaasha Somaliland Iyo Soomaaliya Md. Axmed Maxamed Maxamuud (Siilaanyo) iyo Sh. Shariif Sh. Axmed ay dalka Imaaraadka carabta isku horfadhiisteen iyagoo ah laba madaxweyne oo siman. Waxaana aanu arrintaasi ahmiyad weyn u leedahay dedaaladda Somaliland ku doonayso inay beesha caalamka kaga hesho aqoonsi caalamiya.

Waxaanu Hambalyeynaynaa weftiga miisaanka qaran leh ee madaxweynuhu Hoggaaminayo oo ay ka muuqdaan sadexdii xisbi qaran, Xukuumadii iyo Goleyaashii qaranku. Waxaanu madaxweynaha ku bogaadinaynaa juhdiga uu ugu jiro aqoonsiga Somaliland, waxaanu aaminsan nahay maadaama oo uu ahaa Mujaahid iyo Hoggaamiyihii u soo kifaaxay dib u xorayntii dalka, haddana inuu maanta guntiga u xidho sidii dalka ugu heli lahaa aqoonsigii mudada dheer aynu doonaynay.

Madaxweynaha Somalia waxaanu leenahay Somaliland waa dal madax-banaan mana dhacayso inay mar dambe dib ugu noqdaan midnimadii lagu hunguubay ee Soomaaliya, sidaasi darteed, waxa la gudboon inuu ka shaqeeyo sidii Somaliland iyo Soomaaliya u noqon lahaayeen laba dal oo daris ah oo ka wada shaqeeya cilaaqaadkooda iyo iskaashigoodda.

Waxaanu mar labaad soo dhawaynaynaa wada wajiga labaad ee wada hadalka Somaliland iyo Soomaaliya ee ku qabsoomay wadanka Imaaraadka, waxaanan ka rajaynaynaa in wada hadaladani ay noqdaan kuwo najaxa oo midho wanaagsani ka soo baxaan.”

Cumar Maxamed Faarax
Somaliland.Org/Hargeysa
cumarmfaarax@hotmail.com