War-laliska idaacadii weynayd oo soo gaadhay Berbera iyo Wasaaradda warfaafinta oo ka hadashay

Hargeysa (Somaliland.Org)-War-laliyihii weynaa ee Idaacada Radio Hargaysa oo awood u leh inuu dalka iyo mandaqadab laga wada dhegaysan karo, ayaa Maanta laga soo dejiyay Marsadda Magaalada Berbera,kaasi oo awoodiisu tahay 100kwt.

War-laliyaha Idaacadan oo ku jira laba kontiinar ayaa waxa ka hadlay agaasimaha guud ee Wasaarada Warfaafinta iyo Wacyigelinta Somaliland Faysal Cali Sh. Maxamed oo sharaxaad ka bixiyay Idaacadan Cusub ee Radio Hargaysa ayaa sheegay inay ka mid tahay balanqaadyadii xisbiga Kulmiye ku galay Tartankii Ololaha doorashada Madaxtooyada ee ku wajahnaa sidii ay dalka u keeni lahaayeen idaacad weyn oo wadanka guud ahaantii laga dhagaysto iyo dalalka kale ee mandaqada.

Agaasimuhu wuxuu ku bogaadiyay Madaxweynaha Jamhuuriyada Somaliland ka dhabaynta balan-qaadkaas, taas oo uu tilmaamay inay shuruud u ahayd aqoonsi ay Somaliland ka hesho adduunka.
Agaasimaha Guud waxa uu ummada Somaliland ugu bushaareeyay inay rumowday balan-qaadkaas isla markaana ay heli doonaan wixii war iyo wacyigelin ah ee ay uga oomanaayeen idaacada Radio Hargaysa oo baahinteedu ku sinayd magaalada Hargeysa iyo nawaxigeeda oo kaliya.

Agaasimuhu wuxuu intaas ku daray in keenista idaacadan ay u mareen dhamaanba qawaaniinta dalka u dejisan kuna bixiyeen qandaraas, waxaanu carabaabay in laga soo iibiyay idaacadan cusub wadanka Shiinaha.
Faysal Cali Sheekh waxa uu tilmaamay in idaacadan la soo tijaabiyay kuna rajo weyn yihiin inay dalka yimaadaan 18 injineer oo ka socda shirkadii soo samaysay idaacadan.

Agaasimaha Guud wuxuu sheegay in war-laliska idaacadan cusub lagu rakibi doono muddo ku siman afartan maalmood gudahood lagu rakibo doono idaacadan.

Sidoo kale, Maareeyaha dekeda Berbera Enj. Cali Cumar Maxamed (Xoor-xoor) ayaa sheegay inay deked ahaan u fududeeyeen maamulka Wasaarada Warfaafinta sidii ay War-laliyahan cusub u gayn lahaayeen Magaalada Hargaysa, waxaanu sheegay inuu ku faraxsan yahay inay xukuumadda u rumowdo balan-qaadkeedii la xidhiidhay hirgelinta idaacadda cusub oo uu xusay in goboladda dalku baahi weyn u qabeen.

Cumar Maxamed Faarax
Somaliland.Org/Hargeysa
cumarmfaarax@hotmail.com