Wasiirka Waxbarashada oo Kulan dardaaran ah la Yeelatay Ardaydii Deeqda Waxbarasho ka helay Turkiga

Hargeysa (Somaliland.Org)-Wasiirka Wasaarada Waxbarashada iyo Tacliinta Sare ee Somaliland  Marwo Samsam Cabdi Aadan ayaa maanta kulan dardaaran ah kula   sii  yeelatay xafiiskeeda ardaydii ku guulaysatay deeqda waxbarasho ee dawlada Turkigu  ugu deeqday.

Waxay Wasiirku   kula dardaarantay guud ahaan ardaydaas deeqda waxbarsho ku guulaystay in aqoonta ay soo baranayaan ay dalkooda iyo dadkoodaba uga faa’iideeyaan.

 Wasiirku waxay  intaasi raacisay in Turkigu uu yahay dawlad Islaam ah isla markaana  ay si fudud u fahmi doonaan dhaqanka dalkaas.

“Wadanka aad tagaysaan ee Turkigu waa wadan Islaam ah oo aynu aad iskugu dhow nahay xaga dhaqanka iyo caadooyinka nolasha, markaa waxaan filayaa inaydaan wax dhibaato ah kala kulmi doonin oo aad si fudud u fahmi doontaan dalkaasi,”ayay tidhi Marwo Samsam Cabdi Aadan.

Wasiirka Wasaarada Waxbarashadu waxay  sheegtay in deeqda waxbarasho ee Turkigu aanay ku koobnayn ardaydan la qaadayo balse ay raacsiisan tahay dhisitaanka dugsiyada lagu barto waxbarashada gacanta .

Sidoo kale,  Wasiirka Wasaarada Waxbarashada iyo Tacliinta Sare ee Somaliland   waxay la kulantay ardayda wax ka barata dugsiga Sare ee Gaandi oo cabasho ka muujiyay tayada waxbarasho ee dugsigaas iyo agabka shaybaadhka oo uu dugsiga sare ee Gaandi ka aradan yahay isla markaana ay meesha ka baxday kormeerkii waxbarashada.

“Waan dareensan nahay cabashada aad iigu tiimaadeen runtii awoodayda ahna Wasiir ahaan waxaan u hawl geli doonaa wax ka qabashada tabashadiina, wasaarad ahaana waxaanu ku dedaalaynaa sidii loo heli lahaa  qalabka shaybaadhka ee dugsigu u baahan yahay,”ayay tilmaantay Wasiirku.

Weriye Cumar Maxamed Faarax

Somaliland.Org/Hargeysa

cumarmfaarax@hotmail.com