Mudaneyaasha Golaha Wakiilada oo Ansixiyay Xeerka furista Ururada siyaasadda

Hargeysa (Somaliland.Org)- Mudaneyaasha Golaha Wakiilada Somaliland ayaa fadhigoodii maanta ansixiyay Xeerka furashada ururadda siyaasada iyo wax ka bedelka xeerka doorashooyinka.

Fadhigii maanta ee Golaha Wakiilada Somailand Md. C/Raxmaan Maxamed Cabdilaahi (C/Raxmaan Cirro) waxa madashada ka soo xaadiray 49 Xildhibaan oo ka mid ah Golaha Wakiilada, waxa ogolaaday 29 Mudane, waxa diiday 15 Mudane, waxa ka aamusay 4 Xildhibaan Guddoomiyhuna muu codayn.sidaasi ayaanu ku ansaxay xeerka furista ururada siyaasada iyo wax ka bedelka xeerka hawada.

Xeerkan waxa ku jira lacag deebaaji ah oo lagu xidhay inay bixiyaan ururada siyaasada ee dalka ka furmaya oo qadarkeedu yahay 20 kun oo dollar oo u dhiganta 150 Milyan oo shilinka Somaliland ah.

Xeerkan ayaa la filayaa in maalmaha soo socda loo gudbiyo Aqalka odayaasha Somaliland si ay iyaguna go’aan uga gaadhaan arrintan.

Sadexda xisbi qaran ayaa hore uga soo horjeedsaday furista ururada siyaasada hase yeeshee waxa soo dhaweeyay rayul caamka bulshada Somaliland iyo dadka hungurigu kaga jiro inay tartamaan.

Dhinaca kale, Golaha Wakiilada Somaliland ayaa galay fasax dhan 6 todobaad.

Weriye Cumar Maxamed Faarax
Somaliland.Org/Hargeysa
cumarmfaarax@hotmail.com