Taliyaha Ciidanka Qaranka Somaliland Oo Ka Hadlay Dagaalkii ka Dhacay Deegaanka Gambadha

Hargeysa (Somaliland.Org)- Taliyaha Ciidanka qaranka Somaliland Gen. Nuux Ismaaciil Taani ayaa ka hadlay dagaal saacado badan socday oo shalay galab illaa 7:00 cawaysnimo ee xalay ayaa ka dhacay deegaanka Gambadha ee gobolka Sool.
Taliyaha oo maanta u waramayay Saxaafaddu waxa uu sheegay inay maleeshiyadii huwanta ahayd ee weerarka soo qaaday ay ka qabteen lix maxbuus.
“Shalay dagaal baa ka dhacay deegaanka Gambadha la yidhaahd oo 30 Km dhinaca bari ka xigta magaalada Laascaanood, waxa na soo weeraray koox nabad diid ah oo ka yimid Buuhoodle qaarna isku urursadeen meesha la yidhaahdo Tuko-raq waxaanay ku soo weerareen dhawr tikniko ah way carareen oo way iska tageen mar dambe ayay haddana soo weerareen iyagoo intii hore ka badan markaa dagaal ayaa halkaasi ka dhacay waana la eryaday kooxdii dagaalka soo qaaday. Markii laga soo noqday ee meesha higlada la yidhaahdo ciidanka qaranku marayay saacadduna 4:00 galabnimo ay tahay ayaa kooxdii SSC ah iyo Ciidamo Puntland ah oo wada socda oo wata tikniko ilaa labaataneeye ahi ay soo weerareen ciidanka qaranka waxaana ka dhacay halkaasi dagaal socday ilaa 7-dii cawaysnimo ee xalay.”

Nuux Ismaaciil Taani waxa uu sheegay in ciidanka qaranku ay maleeshiyooyinka Puntland iyo SSC oo is garabsanayay ay dhirbaaxo kulul ku dhufteen, waxaanu intaasi ku daray in ciidanka qaranka uu kaga dhaawacmay dagaalkaasi sadex askari.

“Waxay kooxdan nabad diidka ahi ay doonayaan inay isku dhuftaan Somaliland Iyo Puntland ka dibna ay ka dhex baxaan. Waxaan leeyahay Puntland kooxdan nabad diidka ahi yaanay inaga dhex ridin dagaal aynaan labadeenuba qorshaysan taasi oo aan dan u ahayn Somaliland iyo Puntland-ba waxaanan leeyahay nimankaasi ama qabta ama anaga noo daaya,”ayuu yidhi Taliyaha ciidanka qaranku.

Cumar Maxamed Faarax
Somaliland.Org/Hargeysa
cumarmfaarax@hotmail.com