Guddoomiyaha Xisbiga UCID oo ka hadlay tallaabadii M/weynuhu ku kala diray Guddida Cusbatalka guud

Hargeysa (Somaliland.Org)- Guddoomiyaha Xisbiga Mucaaradka ah ee UCID Eng. Faysal Cali Waraabe, ayaa ka hadlay tallaabada uu Madaxweyne Rayaale ku kala diray Guddidii maamulka Cusbatalka guud ee Hargeysa. Waxaanu Madaxweyne Rayaale ku eedeeyay in aanu aqoon u lahayn waxqabadka Guddidan.

Guddoomiyaha UCID Eng. Faysal Cali Waraabe waxa uu Madaxweynaha ku eedeeyay in uu qaaday tallaabo aanu ka fiirsamay, waxaanu ku tilmaamay tallaabada kala-dirista Guddida mid aanu xaq u lahayn Madaxweynuhu.  “Anigu uma arko in Madaxwaynuhu uu xaq u leeyahay inuu gudida Cisbitaalka uu kala diro, Madaxwayne Rayaale Cisbitaalka waligii muu tagin, gudida caafimaadku waxay qabatay garan maayo, waana agtiisa. Waxa laga yaabaa in Been loogu sheekeeyo oo la yidhaa gudidu waa xisbi hebel, marka intaa ayuun buu u baab’iyey ee ka nixi maayo Bukaanka.” Ayuu yidhi Guddoomiyaha UCID, waxaanu intaa raaciyay oo uu yidhi, “Anigu gudidaas waan al shaqeeyay oo aniga ayaa samafalayaasha Kuwayt ku soo xidhay, maalintii ay qabteen iyo maanta qalabka inoo yaala qaliinka oo kale. Markaa gudidaasi waxay ahaayeen gudi xidhiidh wanaagsan la samaysatay adduunka oo iyagu is-xilqaamay. Waayo lacag may qaadan jirin.”

Mar uu Guddoomiyaha UCID ka hadlayay tallaabadan kala-dirista Guddida, waxa uu ku sifeeyay mid uu Madaxweyne Rayaale wax ugu dhimayo Hay’adaha shaqeeya ee dalka. “Markaa waxay ka mid tahay talaabooyinka Rayaale doonayo inuu dalkan ku baab’iiyo oo aanu ogolayn hay’ad shaqaysa, oo haddii wax kasta isaga ku soo xidhmin isagu waa la col oo umaddan ma danaynayo, markaa waxyaabo kale oo u baahan in la hagaajiyo ayaa jira, markaa taasina waxay ku imanaysaa doorashada oo laga codeeyo.” Ayuu yidhi, waxaanu hadalkiisa ku soo gebogebeeyay oo uu yidhi, “Mida kale, isagu xaq umalaha inuu rido gudi iyadu is xilqaantay meel ay dastuurka kaga taalo inuu isagu guddi is-xilqaantay oo dadku raali ka yahay ka diro ma jirto, markaa aad iyo aad ayaanu uga xunahay arintaa.”

Somaliland.Org

Hargeisa News Desk

wararkasomaliland@gmail.com