Somaliland.Org

Hargeysa (Somaliland.org) – In ka badan Sagaashan kooxood oo ah hawlwadeennada Diiwaangelinta codbixiyayaasha ayaa galabta gaadhey magaalada Berbera ee xarunta Gobolka Saaxil, halkaas oo ay berrito si rasmi ah uga bilaabmi doonto hawsha Diiwaangelinta Codbixiyayaashu.

Kooxahan oo ka hawlgelaya goobaha diiwaangelintu ka dhacayso ee Gobolka Saaxil oo ah goobihii codbixintu ka dhacday doorashadii hore ee gobolkaas, tiradooduna gaadhayso 90 goobood waxay  koox waliba ka kooban tahay 8 xubnood oo ka kala socda; 3 xubnood oo ka kala socda Saddexda xisbi Qaran, Wasaaradda Arrimaha Gudaha 2 xubnood, xubin ka socota Maxkamadda Racfaanka iyo 2 xubnood oo ka socda Komishanka Doorashooyinka Qaranka. Waxaana koox walba la raaciyey qalabka Elektarooniga ah ee lagu samaynayo diiwaangelinta iyo ciidan boolis ah oo ammaanka ilaalinaya.

Kooxahan ka hawlgelaya Gobolka Saaxil waxa la diray maanta, kadib markii ay dhammaysteen tababarro ku saabsan hawsha ay qabanayaan oo maalmihii la soo dhaafey uga socdey magaalada Hargeysa, iyada oo qofkasta oo kooxda ka mid ah loo tababaray hawsha uu u qabanayo hay’adda uu ka socdo ee uu wakiilka ka yahay.

Guddoomiyekuxigeenka Komishanka Doorashooyinka, Cali Maxamed Cabdulle (Cali Biikolo) ayaa galabta u sheegay Somaliland.org in ay gaadheen magaalada Berbera 90 kooxood oo ka mid ah Hawlwadeennada diiwaangelinta, isla markaana ay berrito ka daba tegi doonaan 20 kooxood oo ah kayd. Waxana uu rajeeyey in si fiican hawshu u bilaaban doonto berrito.

Dhinaca kale, gobolka Saaxil oo ay xaruntiisu tahay magaala-xeebeedda Berbera oo ay dadku ka xagaa baxeen ayaa ilaa shalay dadku dib ugu laabanayeen si ay isaga diiwaangeliyaan deegaankooda.

Diiwaangelinta ayaa loogu talagalay in gobol walba 5 maalmood in lagu dhammaystiro, iyada oo 15 maalmood oo kalena loo qorsheeyey in hawlwadeennada qaar ay sii joogaan goobaha si ay u diiwaangeliyaan wixii hadha.

Gobolka xiga oo ah Awdal ayaa isagana la bilaabayaa tababarka hawlwadeennada muddada 5ta maalmood ah ee diiwaangelintu ka socoto Saaxil.

C/risaaq M. Dubbad, Somaliland.org, Hargeysa.