Hoggaamiyayaasha xisbiyada Mucaaridka iyo xukuumadda oo Sheekh kaga qaybgalay Aaska Marxuum Cali Jirde
Sheekh (Somaliland.org) – Madaxweynekuxigeenka Somaliland, mudane Axmed Yuusuf Yaasiin iyo Guddoomiyayaasha labada xisbi ee mucaaridka, Axmed Maxamed Siilaanyo iyo Faysal Cali Waraabe ayaa maanta ka qaybgalay aaska Marxuum Cali Sh. Maxamed Jirde oo lagu aasay magaalada Sheekh ee gobolka Saaxil.
Meydka Marxuumka oo saaka laga qaaday magaalada Hargeysa oo uu ku geeryoodey habeenkii Khamiistii, waxa kale oo ka qaybgalay aas iyo baroordiiq qaran oo lagu sagootiyey Guddoomiyekuxigeenka 2aad ee Golaha Wakiillada, mudane Baashe Maxamed Faarax, xildhibaano ka tirsan Baarlamaanka, siyaasiyiin door ah oo saddexda xisbi ah, masuuliyiin xukuumadda ka tirsan, madax-dhaqameedyo, culima-udiin iyo dadweyne aad u farabadan oo ka kala yimi gobolada dalka iyo degmada Sheekh. Waxayna masuuliyiintaasi ka warrameen taariikhdii marxuumka iyo aqoontii ay u lahaayeen, iyaga oo isku raacay inuu ahaa marxuumku shakhsi aan la koobi karin wixii uu ummadda u soo qabtay, qiimihii uu qaranka ugu fadhiyey. Waxay ku tilmaameen marxuumka inuu ahaa xil-kas, hawl-kar, daacad, aqoonyahan iyo oday dhawrsan oo dhaxal uga tegey ummadda. Waxaana halkaa looga akhriyey duco fara badan. Waxa kale oo ay masuuliyiintu xasuusiyeen dadkii aaska ka soo qaybgalay in qof waliba uu hurran yahay qabriga, sidaa darteed ay ku dedaalaan cibaadada iyo alle ka cabsiga.
Aaska Marxuumku waxa uu dhacay iyada oo uu da’ayo roob mahiigaan ah oo ka curtay deegaanka buuraleyda ah ee Sheekh markii Salaadda Jinaasada lagu tukadey Meydka Marxuumka.
Alle ha u naxariistee, Cali Jirde waxa uu ahaa Injineerkii ugu horreeyey ee Soomaaliyi yeelato, isla markaana wuxuu ahaa Guddoomiyaha ururka Bisha Cas ee Somaliland xilkaas oo uu hayey ilaa hadda oo uu geeryoodey. Waxa kale oo xubin ka ahaa guddida hay’adda Waddooyinka Somaliland.
Waxayna dad badani ku tilmaameen mucjiso in marxuumku uu shaqaynayey iyadoo da’diisu ku dhow dahay 100 jir, isla markaana maskaxdiisa iyo tamartiisa midna aan laga dareemin gabow.
Alle Naxariistii Janno ha siiyo Marxuum Cali Sh. Maxamed Jirde.
C/risaaq M. Dubbad, Somaliland.org, Hargeysa.
TACSI »
Baroor Diiq Iyo Dhambaalo Tacsiiyadeed: Marxuum Yuusuf Tuke Oo Shil Baabuur Ku Geeriyooday