Somaliland.Org

Hargeysa (Somaliland.org) – Madaxweynaha ku-meel-gaadhka ah ee Somaliland, mudane Daahir Riyaale Kaahin ayaa lagu wadaa Isniinta inuu u ambabaxo booqasho uu ku tegayo Dalka Kenya.

Si rasmi ah daboolka loogama qaadin ujeedada booqashadan oo hadalhaynteedu soo baxday wax yar uun kadib markii Daahir Riyaale ka soo noqday socdaal uu dhowaan ku soo maray dalalka Faransiiska, Jarmalka iyo Ingiriiska, waxaana laga bixiyey xogo iyo dareemo la xidhiidha wakhtiga uu ku beegan yahay socdaalkani oo ay Nairobi ka socdaan dhaqdhaqaaqyo diblomaasiyadeed oo heer gobol ah.

Wargeys uu maalgeliyo Daahir Riyaale oo ka soo baxa Hargeysa, Maalmaha ayaa cadadkiisii maanta qoray in mgaalada Nairobi looga diyaargaroobayo soo dhoweynta Daahir Riyaale iyo weftigiisa.

Wargeysku ma sugin wakhtiga uu tegayo mudane Riyaale iyo ujeeddada booqashada, balse, waxa uu sheegay in uu ku tegayo martiqaad rasmi ah oo uu ka helay Madaxweynaha Kenya. Waxana uu ku tilmaamay ujeeddada booqashada mid qayb ka ah dedaal xukuumaddu aqoonsi ugu raadinayso Somaliland, isaga oo iftiimiyey xidhiidh ka dhexeeya booqashada Daahir Riyaale iyo shir ay magaalada Nairobi ku leeyihiin waddamada urur-goboleedka IGAD iyo dowladaha kale ee ku lugta leh arrinta Soomaaliyada qasan, kaas oo sidoo kale lagu martiqaaday Cabdillaahi Yuusuf iyo kooxdiisa dowladda Baydhabo.

Warar kale ayaa iyaguna ishaaraya in Daahir Riyaale loogu yeedhay kulanka Nairobi oo ah mid lagaga arrinsanayo sidii la isaga kaashan lahaa dagaal saf ballaadhan ah oo la doonayo in lagu qaado budhcad badeedda barriinsadey xeebaha Soomaaliya, kuwaas oo khatartooda caalamku si weyn uga qayliyey beryahan dambe, kadib markii budhcad badeeddu gacanta ku dhigtay markab hub u sidey Kenya.

C/risaaq M. Dubbad, Somaliland.org, Hargeysa.