Somaliland.Org

Markay kooxi Orgootaba ma Asooli Karayno. 

Ergo geesi ma diido 

By. Hamud Duale 

Khilaafkii xusbiga Kulmiye ayaa haatan gabagabo ku dhaw. Waxaa kale oo soo ifbaxaysa in la garto oo la ogaado, neefkii fiitowaraariga ah, ee hore uga sheekeeyey, ee 40 sac, habeen walba dabka gelin jirey. 

Sida aynu la wada socono khilaafka ururka kulmiye kuma salaysnay danta guud ee  ururka, mabda’ iyo mid qarantoona. Wuxuu ku salaysan yahay mansab iyo dano gaar ah oo shakhsiyadeed. Waxaynu wada ognahay in markii doorashadii la gaadhey labada xubnood ee ururka u hogaaminaya doorashada innagu soo foole (waa hadday qabsoonto) ay qaarka ka mid ah xubnihii u tartamayey iyo taageerayaashoodii, shirkii ka dareereen, natiijadii ka soo baxdayna ku gacan saydheen. 

Khilaafka noocan ahi mid ugub ma ah oo aanay dadka reer Somaliland hore u soo marin. Waa currad oo waxaa hore loogu soo arkay Ururkii SNM guddihiisa iyo dawladihii Somalilandba. Sidaa daraadeed ma ah in laga gar naqo ee waa in la isweydiiyaa maxaa hore looga yidhi, maxaa laga yeellay. 

Waxaan cuskanayaa Ereygii Maxamed Xaashi Dhamac(Gaariye) ee ahaa:

“Markay Kooxi Orgootaba ma asooli karayno.” 

Waxaa la gudboon Shacabiga, gaar ahaan taageerayaasha kulmiye, in ay ka faa’iideytaan xikmadaa ka dhallatay waayihii la soo maray, oo aannay ku daalin in ay waqti iskaga lumiyaan arrimaha noocan ah. 

Waxaa igu maqaalo ah iyaga oo taa ka duulaya iyo waayo aragnimadii ka soo martay, kooxa ishaysta,  in aan kooxda shirka ka duday ciddi la asoolin, gobolada Togdheer, Sanaag, Sool, Saaxil iyo Waqooyi Galbeed. Hasayeeshee Gobolka Awadal, khilaafkii Ururka Kulmiye samayn weyn buu ku yeeshay. Waxaa la leeyahay Ururkii UDUB ee Awadal ayaa la asoolay  kooxdii ka duday shirkii Golaha Dhexe Kulmiye, ujeeddo kasta ha ka yeeshaane. Markaa Booramay intaa waad ka foojigaan dheeraan jirtee ayaan la idin kala gurin, ee axsaabata ka wada qaybgala hana isku nicina. 

Ururku markii hore wuxuu u qaybtamay koox natiijadii ka soo baxday ku qanacday iyo kooxdii natiijadii ku gancan saydhay. 

Marlabaad waxaa soo baxday in kooxdii natiijadii shirweynaha diiday ay ku kala qaybtamaan Talooyinkii ay u soo jeediyeen Ergadii dhexdhexaadinta khilaafka Ururka. Waxay u kala baxeen koox aqbashay talooyinkii Ergada iyo koox talooyinkii Ergada ka soo fuley ku gacansaydhay.. 

Taasi anniga Waxay ii caddaysay in sacii feetowaraariga ah uu raacay kooxda talooyinka Ergada ku gacan saydhay, ee ducadii ergada habaar  ka doorbiday. Markaa waa in kooxda fiitowaraariga ah la foojignaado. 

Waxaa rajaynayaa  Punt-land waxay heshay laytala khadarkii (26kii ramadaan), in Kulmiyana heshiiyo habeenada Leylatul Qadriga. 

Ciid wanaagsan.