Wadahadalada Xisbiga KULMIYE iyo natiijada kulankii caawa
Hargeysa (Somaliland.org) – Guddiyada xisbiga KULMIYE ee xallinta khilaafkii ka dhashay Shirkii 2aad ee Golaha Dhexe ayaa caawa mar kale kulan isugu yimi si ay u sii ambaqaadaan wejiga 2aad ee wadahadalka oo habeenkii Jimcuhu soo gelayey ka bilaabmay Hotel Ambassador.
Kulankan caawa oo ka dhacay xarunta Akadeemiyadda Nabadda iyo Horumarinta Somaliland, waxa isku soo horfadhiistay laba guddi oo min 7 xubnood ah oo ay kala hoggaaminayaan Guddoomiyaha Xisbiga KULMIYE, Axmed Maxamed Siilaanyo iyo labadii musharrax ee ka cadhooday Shirkii Golaha Dhexe ee lagu qabtay Burco, Muj. Cabdiraxmaan Aw Cali Faarax iyo Axmed X. Cali Cadami.
Wax war ah oo rasmi ahi kama soo bixin kulankaas oo soo gebageboobey goor dambe oo caawa ah. Hase yeeshee, warar ku dhowdhow dhinacyada kulankaas ka qaybgalay ayaa sheegaya in wadahadalku uu u dhacay jawi aad u deggan, isla markaana lagu heshiiyey guddi dhexdhexaad ah oo kulankii kan ka horreeyey ee Ambassador la isla soo qaaday inay goobjoog ka noqdaan wadahadalka, isuna dhegeystaan garnaqsiga labada dhinac.
Guddidaas ayaa la sheegay in la isla qaatay inay noqdaan Lix xubnood oo labada dhinac – dhinaca hoggaanka iyo labada musharrax – midba uu soo magacaabo Saddex xubnood, isla markaana xubnaha guddidaasi ay noqdaan odayaal dhexdhexaad ah oo ka tirsan taageerayaasha xisbiga. Waxaana loo ballamay in kulan kale ay isugu yimaaddaan Arbacada soo socota.
Khilaafkan ayaa waxa uu ka dambeeyey markii laba musharrax Madaxweynekuxigeen ay ka cadhoodeen qaabkii loo doortay musharraxiinta shirkii Golaha Dhexe ee lagu qabtay Burco.
C/risaaq M. Dubbad, Somaliland.org, Hargeysa.
TACSI »
Baroor Diiq Iyo Dhambaalo Tacsiiyadeed: Marxuum Yuusuf Tuke Oo Shil Baabuur Ku Geeriyooday