Somaliland.Org

Hargeysa (Somaliland.org) – Mr. Jaamac Maxamed Ducaale (Foos) oo ay walaalo yihiin Wasiirka Arrimaha Dibadda Somaliland, mudane Cabdillaahi Maxamed Ducaale ayaa muddo laba toddobaad ah ku xidhan magaalada Hargeysa, iyada oo aan maxkamad la horgeyn.

Foos Maxamed Ducaale waxa la xidhay wax yar kadib markii uu ka soo laabtay Shirweynihii beelaha Bariga Burco uga socdey Magaalada Gar’adag ee gobolka Sanaag oo uu ka mid ahaa ergooyinkii Qurbajoogga ee ka qaybgelayey, si cadna looma oga sababta xadhiggiisa iyo wax loo haysto.

Hase yeeshee, waxa la rumaysan yahay in xadhiggiisu yahay aargoosi siyaasadeed oo laga dabajoogo shirkii Gar’adag oo Mr. Foos iyo Axmed Yuusuf Ducaale (Dhigane) oo isku dhinac ahi ay si adag uga soo horjeesteen Buurmadow iyo koox uu horkacayey, kaas oo ay dabada ka wadeen ama taageerayeen Wasiirka Arrimaha Dibadda, mudane Cabdillaahi Maxamed Ducaale iyo Siciid Yuusuf Ducaale oo xubin firfircoon ka ah xisbiga UDUB, isla markaana laga soo eryey magaalada Gar’adag, kadib markii uu qas iyo muran ka abuuray halkaas, isagoo isku deyayey inuu burburiyo shirka.

Dad goob-joog ahaa ayaa sheegay in muddadii uu Gar’adag joogey ay Mr. Foos soo gaadhayeen hanjabaado ah in la xidhi doono marka uu Hargeysa yimaaddo, waaranka qabashadiisuna uu diyaar yahay. Hase yeeshee, waxay wararka qaar sheegayaan in markii uu Hargeysa yimi Jaamac Maxamed Ducaale (Foos) loo sameeyey kiis ama dacwad been abuur ah oo si shirqool ah ay uga soo shaqeeyeen xubnaha qoyskiisa ee ka tirsan xukuumadda iyo xisbiga UDUB.

Shirqoolada iyo Aargoosiga siyaasadeed ayaa ah dhaqan looga bartay xukuumadda Daahir Riyaale oo ay markasta u isticmaasho inay kula dagaalanto mucaaridkeeda. Waxayna tani muujinaysaa in aanay jirin wax dammaanad qaadaya xuquuqda muwaaddinka, awoodda xukuumaddana loo adeegsan karo in la iska xidho qofkii la doono.

Ma aha falkii ugu horreeyey ee noocan ah. Hase yeeshee, Guddoomiyekuxigeenkii hore ee Komishanka Doorashooyinka Xirsi Cali X. Xasan ayaa isaguna weli u xidhan wax loo aqoonsaday aargoosi siyaasadeed, iyada oo laga soo qabtay tuulada Magaala-yar ee Bariga Burco, laguna eedeeyey inuu ku lug lahaa baabuur la sheeganay in kurka la jaray si qori tikniko ah loo saaro, kuwaas oo Booliska Burco sheegeen inay soo qabqabteen, balse, aan la haynin raggii watey iyo wax hub ah oo saarnaa midna. Sidoo kale, ilaa iyo hadda lama oga cidda ka dambeysey arrintaas.

Warar ku dhowdhow Xirsi Cali X. Xasan oo aan weli maxkamad la horgeyn ayaa sheegaya in odayaal ka socda Beesha uu ka soo jeedo Xirsi ay la kulmeen Daahir Riyaale, isla markaana uu u ballanqaaday inuu siideynayo Xirsi.

C/risaaq M. Dubbad, Somaliland.org, Hargeysa