Somaliland.Org

Hargeysa (Somaliland.org) – Dooxa magaalada Hargeysa ayaa caawa fiidkii qaaday Gaadhi Bas ah iyo rakaabkii saarnaa oo tiradooda lagu qiyaasay 25 qof, waxaana socda hawlgal lagu samatabixinayo dadkii saarnaa Baska oo uu qaaday daadku.

Gaadhiga Baska ah oo ka mid ah gaadiidka dadweynaha ee ka dhex shaqeeya gudaha magaalada Hargeysa waxa uu ku sii jeedey xaafadda Biibsiga ee Koonfurta magaalada Hargeysa, waxana uu ka tallaabayey dooxa kala qaybiya magaalada, halkaas oo uu si lama filaan ah ugula kulmay daad xawli ku soconaya oo ka yimi roob galabta makhribkii ka da’ay deegaamada Galbeedka iyo Koonfurta Hargeysa.

Gaadhiga ayaa la sheegay in daadku uu ridey, isla markaana la maqlay qaylada qaar ka mid ah dadkii rakaabka ahaa oo daadku qaaday. Waxaana la sheegay inay u soo gurmadeen ciidanka Booliska oo ka yimi taliska Guud ee Booliska oo ku yaalla dooxa dhinaciisa Koonfureed, kuna beegan wadada dooxa dhexmarta ee ay baabuurtu ka tallawdo intii ka dambeysey markii uu daad ka yimi roobab laxaad lihi ay burburiyeen biriijkii labaad ee Caasimadda Hargeysa, May 2005, kaas oo hadda dhismihiisu socdo.

Dhawr iyo Toban qof oo ay ku jiraan darawalkii baska iyo wiil Geerashboy u ahaa ayaa la badbaadiyey. Waxaana la sheegay in ilaa 7 qof oo kale ay maqan yihiin, kuwaas oo la raadinayo raq iyo ruux.

Wararku ilaa iyo hadda ma sheegin cid ku dhimatay shilkaas.

Xukuumadda Riyaale ayaa muddo 4 sannadood ku dhow ku guuldarraysatay inay dhisto Biriijkaas oo halbowle u ah isu socodka dadka iyo gaadiidka magaalada. Waxana uu hadda ku socdaa qaadhaan ay dadweynuhu iska ururiyeen.

C/risaaq M. Dubbad, Somaliland.org, Hargeysa.