Somaliland.Org

Hargeysa (Somaliland.org) – Xukuumadda Somaliland ayaa beenisey war uu maanta faafiyey Wargeyska Haatuf ee ka soo baxa Hargeysa, kaas oo sheegayey in Ciidamada Itoobiya ay ka baxayaan Soomaaliya, isla markaana hubkooda iyo saanadooda culus ee halkaa taalla ay ka soo wareejin doonaan dhinac Badda, soona marin doonaan dekedda Berbera.

Afhayeenka Madaxtooyada, ayaa warsaxaafadeed uu maanta soo saaray ku beeniyey jiritaanka warkaas, isaga oo ku eedeeyey Wargeyska Haatuf inuu caadeystey wararka been-abuurka noocaas ah.

Warsaxaafadeedka Madaxtooyadu waxa uu yidhi, “Aniga oo tix raacayna wararkii ay soo qoreen wargeysyada qaar ka mid ah maanta oo ay taariikhdu tahay 19/08/08 , kuwaasi oo ay ku sheegeen in ciidamada Itoobiya ee ka guuraya Muqdisho hubkooda culus ay soo marin doonaan Dekeda Magaalada Berbera.

Warkaasi waxa uu yahay mid been ah oo aan waxba ka jirin , sal iyo raad toona lahayn.

Waxa xusid mudan in markii Ciidamada Itoobiyaanku ay galayeen Soomaaliya in wargeysyada qaarkood ay qoreen in ciidamada Itoobiyaanka laga soo dajin doono Dekeda Berbera, sidaa awgeed waxa aanu leenahay warkan ay qoreen wargeysyada qaarkood in uu yahay beentii looga bartay iyo wararkii raqiiska ahaa ee caadada u ahayd in ay qoraan wargeysyada qaarkood, waxana ayaan darro ah in wargeysyo sheeganaya in ay ka mid yihiin warbaahinta qaranka Somaliland in ay beentaa ka iibiyaan shacbiga Somaliland iyo caalamka intiisa kaleba.

Waxa aanu shacbiga reer Somaliland u sheegaynaa in aanay u dhaga taagin wargeysyada noocaas ah ee looga bartay beenta iyo wararka qaran dumiska ah ee ay caadaysteen”.

C/risaaq M. Dubbad, Somaliland.org, Hargeysa.