Gabay: Tol Bariiqay
August 15, 2008
TOL BARIIQDAY
Tol bariiqday belo looga yaab ina Bulaaloowe
Haddii Buurmadow bogoxsadoo hadalka baal jiiday
In buruudka aad leedihiin loola kala baydhin
Ee magac beeshuu huwaday looga biqi waayey
Ee sida biciid jabay birtii lagu bilaaweeyey
Een cayda baydh loo hanbayn duni siduu boobay
Budh la duulka waa lagu yiqiin reerahaas bariye
Bashar baa khaldama ee hadday beeli wada booddo
Tol bariiqday badankeedu noqay ina Bulaaloowe
******************************************************
Burco iyo Sanaag iyo raggaas ootay barigaa fog
Ee hawdka badankoodu yaal tan iyo Buuhoodle
Inaan xumo la beegsado adeer waa bar kutaale
Butidaas qurbaha joogta ee teeda bogan wayday
Ee biirka caanaha sidiis baarka ku cabaysa
Nafta balanbalkeedaa ku yidhi qora bayaan dheere
Haddii kibirku buurta ula baxay waaba la is barane
*******************************************************
Weligiinba baaq aad qorteen buugag ku caddeeya
Ama haddalo aan biic lahayn been isugu sheega
Wallee Buurmadow baan la odhan ma aha Beel-dhaane
Banka dheraran buuraha Sanaag tan iyo Buuhoodle
Badda Saaxil tan Banaadiriyo Beyla iyo Saylac
Togga Bari Buriciyo Sheekh ilaa tan iyo Baardheere
Boorame Hargeysiyo ilaa beledka qooqaani
Bay iyo bakool iyo hadaad doolo kor u dhaaftid
Baankoog haddaad gaadhid iyo tan iyo Belfast
Cid aan Buurmadow garahayn ba’e ii sheega
**************************************************
Idinkaa Bariiqdaye Cismaan bogayey tiisiiye (Boqortooyo)
Beel daaje weeyaan Ilaah siiyey baawarise
Billaduu ku haystaa inuu nabad ku baaqaaye
Kuwo aan badhkiis gaadhin baad daba bashlaysaane
Buun buunintoodaad biyiyo baad ka dhigateene
Iska buuqa ama sii burqada oo bushmaha daasha
********************************************************
Afartaas ma kala baydhiyoo Buur ma kala saaray
Sida badaha waaweyn hirkii bawd ma qabadsiiyey
Ma beyaanshey xaajada ragbaa baal ka gaabsada eh
Imminaka bartaan doonayiyo biligtaydii dheh
*******************************************************
Nimanyahow bananaka u baxee jooga badahaas fog
Ee beenta haasaawiyee beesha ku khaldaaya
Idinkoo bariidada fadliga baal iskala dhaafa
Oo boqonta hoostiyo isjara ubucda baasheeda
Oo gacalku ways bili jiree aan isbixinaynin
Inaad boqorka eed uga dhigtaan wuu na kala baydhshey
Miyaydaan is burin oo runtii baasha kama dhaafin
*************************************************************
Inta aad beyaanada waddaan buuqa iyo reenka
Maad bari u dhooftaan bartii beeshu wada taallay
Oo aad buruudkiinna weyn ugu bushaaraysid
Mase hadal bilaashaad waddaan oo bar kuma taala
********************************************************
Leyliga biyaha daadiyaa malaha beel guure
Buntikhiyo rasaastiyo intaad xumo ku baaqaysid
Oo aad Barbaartaas Togdheer budhadh u dhiibaysid
Oo boogihii laga bogsaday dib u bislaynaysid
Oo beelo laga soo gudbiyo dib u baqoolaysid
Maad beeshu way ba’antehee jaraha boobsiisid
Oo nabadda lama baylahashee baasha ka adkaysid
***********************************************************
Bidhaansiga kursiga loo socdiyo beratankaas dayrta
Nin burji leh ciddii loo bukaa waabay soo bixiye
Ragga bu’aya ee barakaciyo belo ku baaqaaya
Badda Biritin buulkay galeen belo xijaabkeeda
Hadday barakac uga yaabayaan baylah ubadkooda
Marna uma botoriyeen dagaal baaba’ loo galo eh
Waa niman barkimo dheer dhigtoo helaya biilkooda
Oo aan bog iyo beer u nixin ubadka beeshooda
******************************************************
Afartaas ma kala baydhiyoo Buur ma kala saaray
Sida badaha waaweyn hirkii bawd ma qabadsiiyey
Ma beyaanshey xaajada ragbaa baal ka gaabsada eh
Imminaka bartaan doonayiyo biligtaydii dheh
*********************************************************
Hadalkii bataa boog ma dhayo ina Buraaloowe
Badradiyo cilaaqdaas tolnimo beerka lagu gooyey
Ee weliba lagu ba’anyahee laysku boho raacay
Waa barasho ii laabanoo beyd kalaan furiye
Shirka biiqay baydh kama xumayn Boqorkaad maagteene
Isagaa Cismaan buro sidoo looba soo baxaye
Waatay bogaadsheen dadkii diiday baaba’e
Beladuu billaawaha u dhigay boonas lagu siiye
Iska buuqa idinkaa barkaday ceebta badankeede.
Gabaygan waxa curiyey Faarax Aw Maxamuud Maxamed. Waxa uu jawaab u yahay Baaqyadii cayda iyo af-lagaadadu ku lifaaqnayd ee dhowaan lagu faafiyey shabakadaha internetka; kuwaas oo lagu cambaaraynayey Boqor Cismaan Maxamuud Maxamed (Buurmadow) oo lagu cambaareeyey in uu shirkii “Beesha Habar Jeclo ee Garadag ka socday uu reerka ku kala jebiyey. Baaqyadaas oo ay magacyadadooda ku soo taxeen nimo sheegtay “Beesha Habar Jeclo” oo qurbaha ku nool waxa uu aad uga xanaajiyey Boqorka iyo eheladiisa iyo dadka taageera oo dhan. Gabayganina waxa uu ka tarjumayaa dareenka reerka iyo taageerayaasha Boqorka.
TACSI »
Baroor Diiq Iyo Dhambaalo Tacsiiyadeed: Marxuum Yuusuf Tuke Oo Shil Baabuur Ku Geeriyooday