Beegaalka Nolosha
Maalin dhowayto, ayaa waxa aan faafiyey maqaal kooban oo ka hadlayey Arrinta Adhiga, Shirka Gar-adag iyo Xadhigga Mudane Xirsi Cali X. Xasan oo ah guddoome-xigeenkii Guddida Doorashooyinka Somaliland, dhowaanna xilkaas iska casiley. Dar-mareegeed badan oo Internet-ka ka mid ah, ayaa maqaalkaas soo daabacay, hase yeeshee waxa aan la yaabay sida dadka qaar meel daran iyo reero muskood ula qabteen dulucdii iyo farriintii maqaalkaasi xambaarsanaa. Dadka arrintaas sida aniga ila khaldan u sarriftay, waxa ka mid ah Mudane Xuseen Badhmaax oo maqaal ku soo daabacay mareegta www.somalilandpatriots.com, halkaas oo maqaalkaygiina laga heli karo.
Maqaalka Badmaax ladhkiisu waa: Caroogga aad tumaysaa ma cabashaa, mise waa ciil bari. Kayga uu Badmaax ka jawaabayaana waa: Arrinta Adhiga, Shirka Gar-adag iyo Xadhigga Xirsi.
Intaasi markii ay dhacday ee aan akhriyey maqaalkii Xuseen Badmaax, ayaa saaxiibkay Badmaax waxa aan uga jawaabayaa su’aashii maqaalkiisa. Waxa aan isku dayey afarreydan hoose in aan Xuseen Badmaax ugu war tebiyo oo hawada u sii mariyo halka farriintaydu ku qumman tahay. Afarreyda magaceedu waa Beegaalka Nolosha, waxanay soo baxday 12/08/08, waxa ay tidhi:-
Saaxiib Badmaaxow
Sawtan hadalki kaa ba’ay
Kaa bay’dhay toyashadu
Waa maxay bulaankani?
Bigilkanaad tumaysaa?
Xaggaad bayr ka leedahay?
Maxaad baafinaysaa?
Bedenkaagu tebayaa?
Anna kaa bogsiiyaa?
Bixisaa ka salaglee
Waa maxay baroortani
Naxli biirintaadani
Bakhti toosintaadani
Ciil-bari ku taahani
Beel nebcaysigaagani
Shakhsi baacsigaagani,
Maxaad beegsanaysaa?
kala baayacaysaa?
Biyo sare u jeedaa
Barta ay ku soo degi
Baaxaalligaa sheeg?
Bi’i-waa Badmaaxow
Hadalkaan binee idhi
Aan kuu beyaanshee
Waxaan ahay nin baadoo
Beryo dibadda meeroo
Wadnihiisa baallaha
Dabayluhu babbinayaan,
Badda mawjaddeedaan
Hadba baal u raacaa
Bilaalaan ku dhurayaa
Ceelkii Bullaaloo
Baaxadsoorayaashiyo
Berrigaan socdaayoo
Hadba beydan tiriyaan
Baal-goray ku qorayaa
Baylahdeenna kala quban
Ayaan baaciyaayoo
Bartilmaan ku dhigayaa;
Hadba buro ku taalliyo
Basanbaas ka dhaqayaa
Qalinkaygu beegmada
Ma yaqaan barkumataal
Iyo been ku dayashada
Beeluhuu u siman yahay
Barigiyo galbeedkaba
Arladeenna bilicdiyo
Biligiyo ilwaadka leh
Ballankii Ilaahay
Bartii yaqaanna maan ihi
Budulkii dadkaan ahay
Burco iyo Hargeysiyo
Beeraha Wajaaliyo
Boorame dushiisiyo
Buuhoodle weyniyo
Inta Badhan ka raaridan
Ayaan beegsadaayoo
Beledkoo dhan baan ahay
Belo saadin maayee
Waxaan baadi goob ahay:
Inta laga badheedhiyo
Inta lagu billaadiyo;
Inta laga baqooliyo
Inta lagu bariistiyo;
Inta lagu bogsoodiyo
Inta laga baraarugo,
Inta berisamaadkiyo
Nabaddiyo badhaadhaha
Burjigiyo awoodaha
Barakada Ilaahay
Barkhadaha ma dhaafaan;
Inta laga bal reebtiyo
Berdaan lagu negaadiyo
Xaq baan baafinaayaa
Miisaan bulshada sima
Cadli lagu ballaysimo
Beegaalka nololeed
Barigiyo galbeedkaba
Beelaha dhammaantood,
Ninka taas ka baqayow
Ama baajinaayow
Aday baayadaa tahay
Ma baro ama ha baran
Baahidaada weeyaan
Dogob beeri maayoo
Cidla buuqi maayee
Baaqaygu waa kaas.
Qalinkii Maxamed Baashe X. Xasan
TACSI »
Baroor Diiq Iyo Dhambaalo Tacsiiyadeed: Marxuum Yuusuf Tuke Oo Shil Baabuur Ku Geeriyooday