Somaliland.Org

Xaggee ayay iska shabahaan Daahir Rayaale iyo Siyaad Barre?

Marka hore waxaan salaan diiran u tabinayaa bahda saxaafada Somaliland.

Mar labaadka hadii aan wax yar ka iftiimiyo dabeecadaha iyo dhaqanada ay iska shabahaan  Daahir Rayaale iyo Siyaad barre ayaa ah sidan:

1.Labadooduba waxa ay ku xalliyaan arrimaha xooog ama cudud, waxaanay aaminsayihiin in shacabka lagu maquuniyo awood dawladeed oo aan lala galin wax waan waan ah.Waxaana taas ka marag ah dhacdooyinka soo noqnoqda  ee uu ku kaco Daahir Rayaale, sida maalintii dhakhtarka la galay, maalintii dhawayd ee uu dadka xasuuqay iyo maalmo kaleba.Siyaad barrena sidaas si la mid ah ayuu Hargeysa xasuuq uga gaystay 1982.

2.Labadooduba waxa weeye niman meel ka wada shaqeeyay, oo bartay arrimo khuseeya ciidamada, midina waxa uu ahaa Generaal midina waa sirdoon basaas ah, oo fahmay nidaamkii uu dadka u maamuli jiray kali taliyihii geeriyooday.

3.Labadooduba waa kalitaliyayaal.Waxaad taas ku dareemi kartaa Daahir Rayaale waxauu sheegtaa dhamaan awooda dawladeed isaga oo iska dhinac mara dhamaan haayadaha dawliga ah.Waxaanu adeegsadaa erayo ah ‘Aniga, Aniga “ Anigaa waxaas sameeyay, Anigaa anigaa”, taas oo ku ceeb ah dhaqanka iyo diinta intaba.Waayo erayga “Anaa” waxa quraanka ku adeegsaday Fircoon, Qaaruun Iyo Namruud, saddexdabana waa la yaqaanaa halkii ay mareen.

4.Labadooduba waxa ay ka dhigaan xaasaskooda mid ka awood badan dawlada raga ku jira, iyada oo aan la aqoon xilka ay xaasaskoodu qabtaan.Taasna aad ayaad uga wada dharagsan tihiin.

5.Labadooduba waxa ay siyaasadoodu ku salaysan tahay sidii ay kursiga u haysan lahaayeen uun iyada oo aanay eegayn danta ummada.

6.Labadooduba waxa ay neceb yihiin jabhadii mujaahidiinta ahayd ee Somaliland xoraysay ee SNM, taasna waxa daliil u ah, in dhamaan wasiirada ku jiraa aanu midina ahayn jabhadii SNM,  waxaanay xilal sare u dhiibaan raga bartay basaasnimada..

Akhristayaal Somaliland waxa ay u baahan tahay in mar saddexaad loo xoreeyo, oo laga xoreeyo gacanta dhabarjabinta, hangashta, faqashta talada haysa, waayo hadii mar hore Ingiriis aynu erinay,Siyaadna aynu daaqada ka saarnay.Waxa hadhay kacdoon dimuqraadi ah oo awooda lagaga qaado raggan hadda meesha qabsaday,Ee kacdoonkaas u diyaar garooba waana inoo doorashada 2009 insha Allah.

Siciid Maxamuud Gahayr

Islamabad,Pakistan

saedmgahair@hotmail.com, saedmgahair@yahoo.com