Somaliland.Org

Marka hore waxaan salaan u tabinayaa dhamaan bahda saxaafada Somaliland. 

Mar labaadka waxa maanta magaalada Hargeysa ka dhacay mudahaharaad ka dhan ah riigii yaalay Uubaale oo loo wareejinayo Boorama. 

Sida aan ogsoonahay riigani waxa uu dabooli lahaa baahida dad badan oo ku dhaqan magaalada Hargeysa, kuwaas oo ay booyado u dhaamiyaan sanado badan, oo aan wax biyo ah helin.Laakiin xukuumada Somaliland ayaad moodaa in ay rabto in biyaha lagu cunaqabateeyo reer Hargeysa.Taas oo ah wax aan la qaadan karin.Xukumaadu sidoo kale waxay diiday in ay biyaha Hargeysa ku wareejiso dad ganacsato ah oo muwaadiniin ah kuwaas oo ay ka mid yihiin Xildhibaan Khadar Xuseen Aadan(Ambassador), Kaysar Afdiinle Iyo Baxsane, taasina waa ta keentay in ay biyuhu suququl ku noqdaan Caasimada wadanka. 

Magaalada Boorame oo aan booqday 2006, waxa biyaheeda gacanta ku haya shirkad gaar loo leeyahay, waxaanay dadka magaaladasi ka haqab beeleen biyo.Iyada oo aanay biyuhu kala istaagin 24ka saac.Waxase cajiib ah in ay waliba damaaciyaan riigii Hargeysa biyaha u soo saari lahaa, iyaga oo ka faa’iidaysanaya in uu maanta talada gacanta ku hayo Madaxweyne Reer Awdal ahi. 

Hadaba waa yaabe Madaxweyne Boorama biyo la’aani ma hayse ma Hargeysa ayaad harraad ku dilaysaa? Boorama waxaad la rabtaa baraago ay ku dabaashaan??? 

Qasaarasaha uu gaysto mudaharaadkan hadda socdaa waxa tunka ku qaadi doonaa maamulka fadhiidka ah ee uu u taliyo Daahir Rayaale. 

Waxaan ugu baaqayaa Reer Hargeysa in ay diidaan talaabo kasta oo noocan ah oo wax u dhimaysa sharaftooda, waayo biyuhu waa shay aasaasi ah loona baahnaa in laga haqab beelo dhamaan. 

Sidoo kale waxaan Mayorka Boorama ee Hargeysa u yimi in uu qaato riigaas u sheegi lahaa in uu iska laabto maadaama oo aanay taasi dhici karin. 

Waxaan ku soo gabagabaynaa maqaalkan

Hargeysi ma toostay

Hogaanka Ma diiday

Harqoodka ma tuurtay

Maxamed Maxamuud Yuusuf

Freelance Journalist

kingladane@hotmail.com