Somaliland.Org

 

Gabaygan waxa loogu baroor-diiqayaa dhalinyarada Soomaalida ah ee Xeebaha Carabaha isku biimeeya si ay Yurub u galaan.  Waxa gabyaaga gaar ahaan ku kalifay, ka dib markii uu abti u yahay oo la yidhaahdo Maxamed Jaamac Orshe (Caano) loo soo sheegay in uu ka mid yahay dhalinyarad Xeebta Libiya isku biimaynaya si ay Yurub u galaan.  Ninka uu ku hal qabsanayaa waa walaalkii Boqor Cismaan Aw Maxamuud (Buurmadow). 

 

Cismaanoow calooshaay belbelay sida cadaabtiiye

Anoon cudur i-kaarshaa ihayn diiday calafkiiye

Ciir ciir ayaan ahay sidaan cunay sun-ciideede

Casarkii salaaddiyo sahwiyey tii cishaha dowre

Ninkii Caano sahankuu calmaday way caddibayaaye

 

Haddii aan Casiiskeen Ilaah calaf dambe u laabin

Isagiyo caruurtaas camiran carabta xeebteeda

Cidla ciirsilay cararayaan cadow dhexdiisiiye

Safar bay caliqayaan ka culus buurta Ceelefweyne

 

Badda caratay mawjado cakiran belo calool jiifta

Cir madow daruuraha camiran danabka cawleeya

Dabaylaha cabaadaaya iyo caadka lagu meershay

Intaasoo calaamooyinoo laga cabsoonaayo

 

Cawo madow habeen cuurkii tegay goor cabdiba seexday

Doon caaga oon caabin karin nimanka cayntaarshey

Ee cadow maraakiib wataa daba caraabaayo

Ee meesha ay ciirsadeen ciidan kale joogo

Ee ay baddaas camalka xumi cunayso diirkooda

 

Nimankaas casabadood ka tegay iyo cid u caloolyowda

Inta bahalku jiidhkooda cunay ama cagaag laayey

Ee aan cid iyo ciirsi qabin dad u calool diira

Ama dawlad caadila ahoo celisa duulkooda

Caadaqaatayaashaas kursiga lagu calaameeyey

Ee aan calooshoodu nixin sida cawaan geela

 

Adduunyada caddaan iyo madow ceebta ina gaadhey

 Cismaanoow ciddii aan ogayn waa nin ciid galaye

Casrigaynu joognee rag kale degayo caadkaas fog

Caynaanka kuwa noo hayee ceebta ina saaray

Nimankaas cawaanka ah haddaan eebbe cidhib goynin

Oon qaar caqliga maalayaa camalka loo dhiibin

 

Oon caydigaas cararayaa caynka lagu joojin

Oon ciidda ay garanayaan looga camal yeelin

Ma calaacal baa ii bogsiin uurka cabanaaya. 

 

Kuwii ciidan noo noqon lahaa xuudku ku casheeye

Wixii cunugyo dhabarkooda yiil calaliyoo leefye

 

 

Intii aan cadkoodii dhamman ee rabigu caynshey

Iyagoo cidiyihii go’een oo caradu aastay

Oo marada ceeb lagu asturo calalaheed haysan

Ooy sida carsaanyada baddii calalisee tuurtay

Ee ciidan ceelka u fadhiyey taabay cunuqooda

Ee sida cawaan xoolihii ciidda lagu jiiday

Oo cagaha lagu joojiyoo lagu cajiimaayey

Oo siday dad kale cidhib tireen jeelka lagu cuuray

 

Cay iyo ihaaniyo intii camal xun loo geystay

Uu Carabka caaryada lahaa ku calyo tuuraayey

Ee uu candhuuf baqa indhaha kaga casaynaayey

Intaas oo calaamooyinoo laga cadhoonaayo

Iyo kuwo cammuudaas ahoo aan ka yara cagey

Cismaanoow ciddii aan ogayn waa nin ciid galaye

 

Haddaan Caano calafkiisu go’in ama cirfiid qaadan

Oo uu cagaha dhigo halkuu ku ictimaadaayo

Ma casuumad baan dhiga karaa iyo ciyaar heello

Sow weli caruurteennii kale Cadan ma doonayso

Oo dhulaan cagteenuba aqoon caynka uma dhuuqsan

 

Adduunyada caddaan iyo madow ceebta ina gaadhey

Cismaanoow ciddii aan ogayn waa nin ciid galaye

Cibaarooyin badan baa socdoo ciilay ubadkiiye

Casrigaynu joognee rag kale degayo caadkaas fog

Caynaanka kuwa noo hayee ceebta ina saaray

Nimankaas cawaanka ah haddaan eebbe cidhib goynin

Ma calaacal baa ii bogsiin uurka cabanaaya. 

 

Faarax Maxamuud

 

farahmohamed@somalimedia.com