Somaliland.Org

Hargeysa (Somaliland.org) – Munaasibado loo sameeyey xuska sannad-guuradii 48aad ee ka soo wareegtey markii Somaliland gobanimadeedii luntay ka qaadatay Boqortooyadii Ingiriiska, 26 June 1960 ayaa maanta iyo caawa lagu qabtay meelo kala duwan oo Somaliland ah.

Munaasibadaha xuska 26ka June waxa maanta lagu qabtay gobolada dalka qaarkood, iyada oo magaalada caasimadda ah ee Hargeysa oo aan maanta laga xusinna caawa lagu qabtay Qasriga Madaxtooyada xaflad loogu talagalay xuska munaasibadda 26ka June. Waxaana ka qaybgalay masuuliyiin iyo martisharaf door ah oo ay ka mid yihiin Shirguddoonada labada aqal ee Baarlamaanka iyo xisbiyada mucaaridka ah iyo masuuliyiin ka socda hay’adaha Samafalka Caalamiga ah ee dalka jooga.

Xafladdan oo ammaankeeda aad loo adkeeyey, waxa ay ka kooban tahay casho iyo masraxiyad ka hadlaysa munaasibadda oo ay soo bandhigayaan fannaaniinta Qaranku. Dhinaca kale, magaalada Burco ee xarunta Gobolka Togdheer ayaa munaasibad ballaadhan maanta loo sameeyey xuska 26ka June, waxaana fagaaraha Khayriyada Burco isugu soo baxay dadweyne aad u farabadan oo reer Burco ah, halkaas oo ay dadka hadal uga jeediyeen Badhasaabka gobolkaas, Mr. Jaamac Cabdillaahi Biin iyo siyaasiyiin ka tirsan xisbiyada Mucaaridka ah.

Munaasibadda 26ka June oo ku suntan markii u horreysey ee calan Soomaaliyi leedahay oo xor ah la taago, waxay ahayd maalin Soomaalidu aad u qiimayso oo xuskeedana aad loo weyneeyo, hase yeeshee, waxay u muuqataa in la shiiqiyey maalintan oo ay shiiqisay ama meesha ka saartay 18ka May oo ah markii Somaliland dib ula soo noqotay madax bannaanideeda, kadib halgan adag oo nafo badan iyo hanti badan gallaaftay oo qaybo ka mid ah dadka Somaliland ay la galeen dowladdii ka talinaysey Soomaaliyadii ay Somaliland sida shuruud la’aanta ah ula midowdey, 4 maalmood kadib 26 June 1960 markii ay xorriyadda qaadatay.

C/risaaq M. Dubbad, Somaliland.org, Hargeysa.