Somaliland.Org

Burco (Somaliland.org) – Gudoomiyaha Gobolka Togdheer Jaamac Cabdilaahi Warsame (Biin) ayaa maanta si adag u cambaareeyay kulan lagu qabtey magaaladda Burco islamarkaana waxa uga digey Ganacsatada Hudheelada waaweyn in aanay dhiirigalin inay ku gafaan sharciga dalka.

Gudoomiyaha Gobolka Togdheer oo shir jaraa’id oo uu kaga hadlayo arrintan ku qabtay xafiiskiisa Burco waxa uu jawaab kulul ka bixiyay shir 26 April lagu qabtay Hotel Barwaaqo kaasi oo lagaga hadlayay in Wasiirada Dowladda lagala hadlo sidii loo dhimi lahaa canshuurta iyo waliba qodobo kale.

Shirkan oo ay soo qabanqaabiyeen guddiyo iskood isu abaabuley oo ka kala yimi qaybaha bulshada, isla markaana barnaamujkooda ugu magacdaray “Sidaynu u noolaanaa” ayna ka qaybgaleen ilaa boqol qof oo qaarkood ahaayeen ganacsatada adhilayaasha iyo kuwa kaleba waxaa gabagabadii lagaga dhawaaqay guddi loogu talogalay inay mushkiladaha sicir bararka iyo korodhka qiimaha shidaalka toos ugala xaajoodaan xukuumadda.

Laakiin Gudoomiyaha Gobolka ayaa waxa uu shirkaa ku tilmaamay mid aan waafaqsanayn shuruucda dalka, isla markaana aan wax oggolaansho iyo wada tashi ah lagala yeelan madaxda Gobolka, kaasi oo uu warkiisa ku sheegay inaanay jirin baahi cad oo xiligan loo abaabulo shir noocan oo kale ah.

Gudoomiyaha Gobolka isaga oo shirkiisa jaraa’id ka hadlaya waxa uu caddeeyay inay shirkaasi u aqoonsadeen mid siyaasadeed oo aan ka turjumeyn dhibaatooyinka afka laga sheegay xiligan ay xukuumadda Somaliland xallisay dhibaatadii ka dhalatay sicirkii shidaalka ee la kordhiyay, xalkaas oo uu sheegay inuu yahay xukuumadda oo oggolaatay in ganacsatadu ay shidaalka ka keenaan meesha ay doonaan.

“Waxa qaadan waa igu noqotay markii aan maqlay Xukuumadda ayaa loo yeedhayaa. Xukuumadda anagaa ka wakiila miyaanay ahayn inay noo soo maraan” ayuu yidhi.

Gudoomiyaha waxa kale oo uu shirkiisa ku sheegay in shirkani uu ahaa mid lagu wiiqayo haybadda Dowladda waxaanu uga digay Hudheelada in lagu qabto shirar uu ku tilmaamay kuwo duminaya nabadgalyada.

Geesta kalena dhawaaqan Gudoomiyaha ayaa waxa uu ku soo beegmay xilli ay mushkiladda shidaalka iyo maciishadda oo ay ka dhasheen shirar iyo dhaqdhaqaaqyo kala ujeeddo ah.

Siciid Axmed Raage

Burco Somaliland