TACSI: Marxuum Maxamed Jaamac Guuleed
Anigoo ku hadlaaya magaca Jaaliyadda Soomaliland ee Wales waxaan tacsi u dirayaa ubadka, walaalada, ehelka, qaraabada, xigaalka, iyo asxaabta gaar ahaan tafiirtiisa degan UK ooy ugu horreeyaan inta ku nool magaaladan Cardiff. Sidoo kale waxaan tacsi u dirayaa Jaaliyadda Soomaliland ee Wales, gaar ahaana odayada ka sii nool badmareenkii hore oo uu ka tirsanaa.
Alle ha u naxariistee Marxuum Maxamed Jaamac Guuleed waxaa lagu aasay maanta oo axad ah taariikhduna tahay 27/04/2008 magaaladan Cardiff.
Marxuum Maxamed waxuu ahaa nin oday ah oo ka mid ahaa xubnihii dalkan ugu soo horreeyey ee soo galay gobannimadii ka hor. Waxuu ahaa oday Jaaliyadda Wales ka dhex muuqda hawl kasta oo bulshada mideynaysa. Waxuu ahaa nabadoon dhab ah oo waji furan, run sheeg badan oo gar-yaqaan ah. Marxuum Maxamed waxa lagu yaqaanay diin jaceyl iyo cibaado badan, isagoo waqti badan ku qaadan jiray masaajidda. Waxaa lagu xusuustaa hawlkar aan dalka iloobin oo hanti gashaday degaanka uu ka soo jeeday ee Gaashaamo iyo Burco Galbeed, waxaana ka mid ah guryo iyo huteel uu ku lahaa Burco.
Marxuum Maxamed Jaamac Guuleed, waxaan Illaahay uga baryayaa inuu u naxariisto oo uu janatal fardows ku abaal mariyo, innagana dhammaan inaga siiyo samir iyo Iimaan.
Ahmed Arwo
Guddoomiyaha
Jaaliyadda Soomaliland Wales
Cardiff UK
samotalis@gmail.com
TACSI »
TACSI: Amran Haybe - Xaaska Xaji Xasan Axmed Geedi (Xasan Humbus)