Somaliland.Org

Hargeysa (Somaliland.org) – Shir ay u ballansanaayeen inay isugu yimaaddaan Golayaasha Dhexe iyo Guddiyada Fulinta ee labada xisbi ee mucaaridka ah ee UCID iyo KULMIYE, 27 April oo ku beegan berrito ayaa dib loo dhigay muddo aan la cayimin.

Masuuliyiin ka tirsan Hoggaanka Xisbiga KULMIYE oo maanta shir jaraa’id oo ay ku qabteen xarunta dhexe ee xisbiga, lagu weydiiyey warar sheegaya inuu dib u dhacay shirkii ay u ballameen labada xisbi ayaa xaqiijiyey in shirkaas uu ku yimi dib u dhac maalmo ah, balse, uu qabsoomi doono.

Guddoomiyekuxigeenka 1aad ee Xisbiga KULMIYE, Muj. Muuse Biixi Cabdi oo ka jawaabayey sababta dib u dhaca shirkaasi keentay ayaa waxa uu yidhi, “Horta waxaan idiin sheegayaa hawshaa maanta annaga iyo UCID mawqif midaysan baanu ka taagan nahay, dhibaatooyinkaa maanta isku si baanu u aragnaa, waanu ka wada soconnaa, isku talaanu nahay”.

Waxana uu sheegay in ay jiraan gudaha iyo dibaddaba dad danaynaya shirkaas oo dalbanaya in loo hakiyo ama talooyin ku soo biirinaya.

“Waxaanse kuu sheegayaa shirkii wuu jiraa, wuuna qabsoomayaa. Waa maalmo wuxuu dib u dhacaa farsamo iyo talo loo badsanayo,” ayuu yidhi Muj. Muuse Biixi.

“Shirkaana waxaanu ku doonaynaa wanaag. Shirkaa waxaa lagu wadaa, Madaxweynaha wakhtigiisii wuu dhammaanayaa, madaxweynahana 5 sannaa la doortay. Maxaynu yeellaa?” ayuu raaciyey.

Dhinaca kale, Guddoomiyaha xisbiga UCID, Faysal Cali Waraabe ayaa shir jaraa’id oo uu Khamiistii qabtay ku sheegay in beesha caalamku ka codsatay inay dib u dhigaan shirkaas.

Lamana sheegin wakhti kale oo uu qabsoomayo.

C/risaaq M. Dubbad, Somaliland.org, Hargeysa.