Somaliland.Org

Hargeysa (Somaliland.org) – Xukuumadda Somaliland ayaa si kulul u cambaaraysay Guddida Dhaqaalaha ee Golaha Wakiillada oo shir jaraa’id oo ay qabteen toddobaadkan ugu baaqay shacbiga Somaliland in aanay bixin cashuur sharci darro oo aanu Golaha Wakiilladu ansixin, iyaga oo ka hadlayey tacriifadda ay kordhisey Dekeddu.

Afhayeenka Madaxtooyada ayaa warsaxaafadeed uu maanta soo saaray jawaab kaga bixiyey hadalkaa Gudidda Dhaqaalaha, waxana uu ku tilmaamay khiyaama qaran.

Warsaxaafadeedka Madaxtooyadu waxa uu yidhi,

“Aniga oo tix-raacaya hadalkii ay jaraa’idka qaarkood ku qoreen Guddida Dhaqaalaha ee Golaha Wakiilada Somaliland, laguna baahiyay Baraha Internetka qaarkood, kuwaasi oo ay ugu baaqeen Shacbiga Somaliland in aanay Cashuurta Bixin.

Waxa haddaba aanu Leenahay Hadaladaasi ka soo yeedhay Guddidaasi oo uu hogaaminayo Maxamed Maxamuud Cumar Xaashi, waxa cadaan ah oo aan cidna ka qarsoonayn in ay yihiin khiyaamo Qaran oo dhaawac weyn gaadhsiin karta jiritaanka iyo Nabada Somaliland.

Waxa aynu wada ognahay in dalalka caalamka oo dhami ay ku socdaan Cashuurta shacbigoodu bixiyo, iyada oo ay Somalilandna ay kaba sii xag jirto oo ay tahay dal curdin ah oo aan weli la aqoonsan, wax dhaqaale ahna ka helin deeq bixiyayaasha Caalamka.

Haddaba, haddii la bixin waayo cashuurta yar ee aynu dalka ku maamulno, Maxay ku danbayn doontaa Somaliland haddii aynu is weydiino.

Waxa haddaba wax lala yaabo lagana yaq-qasoodo ah in nin Xildhibaan ah oo ummadu soo dooratay hadalada noocaasi ah shacbiga Somaliland uu ugu baaqo”.

Warsaxaafadeedku waxa uu sheegay in baaqaasi ka soo baxay xildhibaanada iyadoo caalamku u soo jeestey Somaliland, waxana uu taxay warbixino lagu amaanayo waxa ay qabsatay Somaliland oo la faafiyey.

Waxana uu ku soo gebagabeeyey, “Ugu danbayntii , waxa aanu ku talinaynaa Xildhibaan Maxamed Maxamuud Cumar Xaashi iyo inta la mid ahba in ay raali gelin ummada ka siiyaan hadaladaasi ka soo yeedhay, isla markaana ay bixiyaan cashuuraha ku biiray ee guryahooda lagu leeyahay’’.

C/risaaq M. Dubbad, Somaliland.org, Hargeysa.