Somaliland.Org

Berbera (Somaliland.org) – Maareeyaha Dekedda Berbera, Cali Cumar (Xoor-xoor) ayaa caddeeyey inay kordhiyeen tacriifadda cashuurta laga qaado badeecadaha ka soo degga Dekedda, balse, waxa uu sheegay in korodhka cashuurtu uu yahay wax aad u yar ee aan la kordhin 50%.

Maareeyaha Dekedda oo maanta xafiiskiisa Berbera ku qabtay Shir jaraa’id waxa uu sheegay in cashuur yar ay ku kordhiyeen badeecadaha dekedda ka soo dega ee ay ka midka yihiin raashinka, bagaashka iyo Kontiinarada, waxana uu sheegay in badeecadahaas cashuurta lagu kordhiyey ay tahay mid aad u khafiif ah oo aan culays badan ku keenayn macaamiisha dekedda.

Tusaale ahaan waxa uu sheegay in raashinka halka Ton lagu kordhiyey Sl.shs. 3,000 (Saddex Kun Somaliland Shillings), taas oo uu sheegay in gadbadda raashinka ah ay ku kordhayso Sl.Shs 150 (Boqol iyo Konton Shilin).

Waxana uu sheegay in sababta keentay korodhka Tacriifadda dekeddu ay tahay in lagu kabo mushaharka shaqaalaha dowladda, maadaama xilligan ay jirto ayuu yidhi sicir barar ku dhacay maceeshadda.

Maareeyaha Dekedda Cali Xoor-xoor waxa uu sheegay inay tahay markii u horreysey ee la kordhiyo tacriifadda dekedda muddo toban sannadood ah, waxana uu sheegay in aad looga fekerey, daraasadna lagu sameeyey saamaynta ay ku yeelanayso macaamiisha dekedda.

Korodhka tacriifadda dekeddu waxa uu yimi iyada oo uu jiro sicir bararka maceeshadda oo la sheegay inuu dunida oo dhan saameeyey, abaar daba-dheeraatay oo dad iyo duunyoba khatar ku haysa, dhaqaale xumo, taas oo ay weheliso qiimaha Shidaalka oo ay Shirkadda TOTAL cirka ku shareertay.

Waxa kale oo jirey 2% xukuumaddu ku kordhisey cashuuraha oo loogu talagalay dib u dhiska gobolka Sool iyo cashuuraha oo horeba u cuslaa.

Guddida Dhaqaalaha ee Golaha Wakiillada ayaa iyagu sheegay in korodhka tacriifadda Dekedda uu yahay sharci darro, maadaama dastuurku dhigayo in aan la qaadin cashuur ama tacriifad aanu Golaha Wakiilladu ansixin. Waxana uu guddidu ugu baaqay shacbiga Somaliland in aanay ogolaanin cashuurtaas sharcidarada ah.

C/risaaq M. Dubbad, Somaliland.org, Hargeysa.