Somaliland.Org

Burco (Somaliland.org) – Ganacsatada kaalmaha shidaalka Magaalada Burco ayaa maanta ku dhaqaaqay shaqo joojin midaysan oo 24kii saacadood la soo dhaafay ay ku hakiyeen iibinta shidaalka qaarkood.

Ganacsatada kaalmaha oo tan iyo 5:30 shantii iyo badhkii galabnimo maalintii shalay si rasmiya u joojiyey iibinta shidaalka naaftada, waxay shaqo joojintooda ku tilmaameen inay salka ku hayso korodhka sicirka shidaalka oo ay shirkada TOTAL ku dhaqaaqday maalintii isniintii la soo dhaafay.

Xamse Cadow Yuurara oo ah afhayeenka ganacsatada kaalmaha shidaalka ee Burco oo maanta kaga hadlayey arintan kulan ay xarunta Gobolka kula yeesheen Gudoomiyaha Gobolka ayaa waxaa uu cadeeyey inay sicirka naaftada ay shirkada Total ku kor dhisay $ 62 Dollor halkii foosto, halka foosatada Batroolkana ku kordhiyeen $25 Dollor.

Afhayeenka waxaa uu warkiisa ku sheegay in foostada naaftada ah oo xilligii hore ay ka siisan jireen shirkadda TOTAL $141 Dollar ay hadda ka dhigtay $203 Dollar, halka ay foostada Batroolka ah ugu iman jirtay $142 Dollar uu hadda marayo $167 Dollar, taasi oo ka dhigaysa in 40% uu kordhay qiimaha shidaalku.

“ Waxay nagu kaliftay in aanu garan wayno waxaanu ku iibin wayno iyo waxa aanu ka helayno,” ayuu yidhi Xamse, isaga oo sababaynaya go’aanka ay ku joojiyeen iibinta shidaalka.

Afhayeenka Ganacsatada Shidaalka waxaa kale oo uu ka cawday in Wasaarada Maaliyadu ay mamnuucday shidaalkii jabnaa ee ka iman jirey xeebaha Soomaaliya iyo weliba waddanka Ethiopia, isla markaaana ay soo rogtay ganaax culus cidii lagu qabto shidaalka Kotorobaanka ah, waxaana uu ku eedeeyeen Wasaarada Maaliyadda inay iyadu qayb ka tahay suququlka shidaalka oo ka jira Magaalada Burco.

Maamulaha Customka Burco Ibraahim Cawil Xaaji Nuur oo aanu kala xidhiidhnay cabashada ganacsatada shidaalka ee ku wajahan wasaarada Maaliyada ayaa waxaa uu sheegay in aanay jirin mushkilad ay wasaarada Maaliyaddu ku leedahay shidaalka, balse waxaa uu ka gaabsaday in uu faahfaahin ka bixiyo arrinta ganaaxa iyo arimaha kale ee laga cabanayo wasaarada maaliyada.

Xaaladan shaqo joojinta shidaalayda waxaa ku soo beegan tay xilli ay ka socoto magaalada Burco hawlaha biyo dhaamiska iyo gurmadka ay hay’adaha ku gudbinayaan biyaha taasi oo ilaa shalay aanay shaqayn gaadiidka biyaha ee ku jira hawlgalka gurmadka abaaraha.

Geesta kalena, Gudoomiyaha Gobalka Togdheer Jaamac Cabdillaahi Warsame Biin ayaa isaguma taar qaylodhaan ah u diray Wasaaradda Arrimaha Gudaha, waxana uu ka dalbaday wasaarada Daakhiliga inay ka jawaabto xaalada halista ah ee ka dhalatay gaadiidka booyadaha ee hakiyey gurmadka biyaha.

Gudoomiyuhu waxa uu Taarka degdega ah kaga codsaday wasaaradiisa in la fasaxo shidaalada kale ee soo galaya Magaalada Burco si aanay u fadhiisan adeega korontada, biyaha, iyo weliba haraadka daran ee ka taagan deegaankada Gobolka qaarkood, taas oo ahmiyadu tahay in ganaaxa laga dhaafo shidaalka si looga helo cashuur tan iyo inta lagu jiro xaalada abaaraha.

Todobaadka gudihiisa ayaa maamulka degmada Duruqsi waxay ku dhawaaqeen in ilaa iyo hada 2 laba qof ugu dhinteen haraad deegaanadooda, kaasi oo ay jiraan meelo kale oo ka mida gobolka Togdheer, oo laga werwersan yahay nolosha dadka iyo duunyada.

Reported Bu Yusuf I Warsame

Ilka Case, Burco.

Xagaa67@hotmail.com