Somaliland.Org

Hargeysa (Somaliland.org) – Golaha Wakiillada Somaliland ayaa shalay yeeshay fadhi albaabadu u xidhan yihiin, kaas oo lagaga wadahadlayey turxaanbixinta golaha dhexdiisa iyo sidii Goluhu mawqif iyo kaalin uga qaadan lahaa xaaladdan cakiran ee dalku haatan marayo.

Fadhigan albaabadu u xidhan yihiin oo uu shirguddoonku u soo jeediyey Golaha fadhigii Axaddii, waxa uu daba joogaa fadhiyo hore oo albaabadu u xidhnaayeen oo uu goluhu yeeshay kalfadhigii hore, kuwaas oo lagaga wadahadlayey turxaanbixinta golaha oo fikradaha xisbiyadu ay kala jiiteen xildhibaanada ka kala yimi saddexda xisbi, taas oo mararka qaarkood caqabad ku noqota hawsha golaha.
Hase yeeshee, warar ku dhowdhow fadhigaa albaabadu u xidhnaayeen ee shalay ayaa sheegaya in ujeeddada ugu weyn ee Goluhu ka arrinsanayaa ay tahay xaaladdan carikan ee dalku haatan galay iyo kaalinta Golaha Wakiilladu ka qaadan karo ama mawqifka uu iska taagayo.

Lama ogaan waxa ka soo baxay fadhigaas, balse, waxa la sheegay in Goluhu u ballamay fadhi kale oo albaabadu u xidhan yihiin Arbacada berrito. Waxayna wararku sheegayaan in fadhigaa Axaddii uu ahaa turxaanbixin keliya.
Guddoomiyaha Golaha Wakiillada, mudane Cabdiraxmaan Maxamed Cabdillaahi (Cirro) ayaa dhowaan sheegay in Golaha Wakiilladu door dhexdhexaadin ah ka ciyaari doono xaaladda hadda dalka ka taagan ee ka dhalatay go’aanka Golaha Guurtidu muddada xilka ugu kordhiyey Madaxweynaha oo murangeliyey muddada doorashadu dalka ka dhacayso.

Waxaana la filayaa in fadhiyadan albaabadu u xidhan yihiin ee Goluhu ay ku saabsan yihiin sidii goluhu doorkaas u qaadan lahaa.

Dhinaca kale, Golaha Wakiillada fadhigiisii maanta waxa mudanayaasha loo qaybiyey Xeerka Dhismaha Komishanka Xuquuqul Insaanka Qaranka, xeerkaas oo xukuumaddu u soo gudbisey Golaha, kadibna goluhu ka dooday. Waxaana mudanayaasha loo qaybiyey maanta iyada oo lagu sameeyey wax-ka-beddel ku salaysan dooddii xildhibaanadu ka dhiibteen.

Komishanka Xuquuqul Insaanka oo uu magacaabay madaxweyne Riyaale ayaa shaqanayey iminka muddo 2 sannadood ka badan, kaas oo hoos jooga wasaaradda Caddaaladda, balse u shaqeeya sidii hay’ad xuquuqul Insaanka ilaalisa oo madax bannaan.

Wax-ka-beddelka xeerkan lagu sameeyey ayaa ka dhigaya Komishanka Xuquuqul Insaanka Guddi Qaran oo 7 xubnood ah, kuwaas oo uu Madaxweynuhu magacaabayo isaga oo raacaya shuruudo xeerkaasi tilmaamay, balse, gudahooda iska dooranaya hoggaankooda.

C/risaaq M. Dubbad,

Somaliland.org, Hargeysa.