Somaliland.Org

Waxa loo xidhxidhay afkaartooda ku wajahan muddo kordhinta Riyaale

Hargeysa (Somaliland.org) – Laba Caaqil iyo Oday ka mid ahaa koox cuqaal ah oo dhowaan Hargeysa ka soo saaray bayaan beeleed oo ay kaga soo horjeeddaan Mudda-kordhinta Madaxweynaha, ayaa la xidhay maanta.

Chief Caaqil Deeq Cabdillaahi Cali ayaa Radio Horyaal iyo Somaliland.org u xaqiijiyey galabta in Chief Caaqil Keyse Bade Cabdille, Caaqil Baashe Cismaan Yuusuf iyo Oday Jaamac Simane la xidhay maanta, iyada oo boolisku ka qabqabtay meelo kala duwan oo magaalada Hargeysa ah, isla markaana la doondoonayo cuqaal iyo odayaal kale oo uu isagu ka mid yahay.

Cuqaasha la xidhxidhay oo ka mid ah madax-dhaqameedyada beel ka mid ah beelaha waaweyn ee Hargeysa (Arab), waxa xadhigooddu ka dambeeyey bayaan ay cuqaasha iyo odayaasha beeshaasi soo saareen 13 April oo ay kaga hadlayeen xaaladda siyaasadeed ee dalku wakhtigan marayo iyo mawqifka beel ahaan ay ka taagan yihiin arrimaha socda, kaas oo ay ku caddeeyeen inay ka soo horjeedaan mudda-kordhinta Guurtidu u ansixisay Madaxweyne Riyaale oo ay ku tilmaameen sharci-darro iyo inay taageersan yihiin heshiiskii saddexda xisbi iyo Komishanku ka gaadheen wakhtiga doorashooyinka iyo diiwaangelintu qabsoomayaan.

Caaqil Deeq Cabdillaahi oo arrintaasi ka hadlayey ayaa sheegay in baaqaasi uu ka soo baxay shir ay isugu yimaaddeen cuqaal fara badan, kadib markii ay odayaashu wax iska weydiiyeen ayuu yidhi xaaladda dalku wakhtigan ku jiro oo uu ku tilmaamay mid aan laga aamusi karin. Waxana uu sheegay in cuqaashu soo dhoweeyeen heshiiskii saddexda Xisbi iyo Komishanka oo ay u arkeen mid dejiyey dareenkii dadweynaha, balse, uu carqaladda abuuray, dalkana jaahwareer geliyey go’aankii Guurtidu muddada xilka ugu kordhisey Madaxweynaha.

Sidaa darteed, waxa uu sheegay Caaqilku in Cuqaashu ay gudatey xilka ka saaran dalka iyo dadka ee ah inay tilmaamaan wixii nabadgelyada iyo xasiloonida iyo horumarka dalka waxyeelaya. Waxana uu sheegay in mawqifkaas ay isaga iyo cuqaasha kaleba taagan yihiin, xadhig iyo hanjabaadna aanay kaga noqonayn.

Caaqilku waxa uu ku tilmaamay xadhiga cuqaasha wax aanu filayn inay Somaliland ka dhici karto oo la yaab leh.

Dhinaca kale, waxa uu Caaqil Deeq soo qaaday Cuqaal kale oo reer Hargeysa ah oo xalay iyaguna ka hadlay Telefishanka Dowladda, kuwaas oo difaacayey Xukuumadda iyo mudda-kordhinta Guurtida, isla markaana dadka ka sheeganayey magaalada Hargeysa, gaar ahaan siyaasiyiinta mucaaridka. Waxana uu sheegay inuu xalay Telefishanka dowladda ka arkayey cuqaashaas oo ka hawlaysa xaaladda, uuna u arko in cuqaashu kala aragti duwanaan karo arrinta.

“Marka Dalka taladiisu halkay ku fiican tahay cidda ka hadasha ayaa sidan loo cabudhinayaa bay ila tahay,” ayuu yidhi Caaqil Deeq.

C/risaaq M. Dubbad, Somaliland.org, Hargeysa.