Somaliland.Org

Hargeysa (Somaliland.org) - Madaxweynaha Somaliland, Daahir Riyaale Kaahin ayaa maanta xafiiskiisa kula kulmay Ergeyga Midowga Yurub u qaabilsan arrimaha Soomaaliya iyo Somaliland, Ambassador Georges Marc Andre. Waxayna ka wadahadleen arrimo ku saabsan horumarinta dimuqraadiyadda iyo kaalmada Midowga Yurub siiyo Somaliland.

Afhayeenka Madaxtooyada, Siciid Caddaani Mooge ayaa warsaxaafadeedkan ka soo saaray wadahadalkii dhexmaray Madaxweynaha iyo Ergeyga:-

“Madaxweynaha JSL Mudane Daahir Rayaale Kaahin waxa uu Maanta xafiiskiisa kulan kula yeeshay Ergayga gaarka ah ee Midowga Yurub u qaabilsan Arrimaha Somaliland iyo Soomaaliya Ambasador Georges Marc Andre oo fadhigiisu yahay Magaalada Nayroobi ee Caasimada dalka Kenya .
Madaxweynahaha Somaliland iyo Mark Andre waxay ka wada hadleen xidhiidhka iyo Iskaashiga ka dhexeeya Jamhuuriyadda Somaliland iyo Midowga Yurub iyo sidii loo sii xoojin lahaa xidhiidhkaas gaar ahaan Arrimaha ku tacaluqa siyaasada iyo Mashaariicda horumarinta ah ee Midowga Yurub ay ka wado Somaliland.
Madaxweynuhu waxa uu si qoto dheer uga waramay Arimaha Somaliland ay qabsatay iyo heerka ay maanta marayso .waxana uu si gaar ah carabka ugu dhuftay in Beesha Caalamku si aan cadaalad ahayn ay ula dhaqantay Arrimaha Somaliland, inkasta oo ay Somaliland hir gelisay Nidaam Dawli ah oo ku salaysan dimuqraadiyad iyo wada tashi , taas oo ay haboon tahay in wadamo badan oo Afrika ahi ay kaga daydaan.
Madaxweynuhu waxa kale oo uu soo qaaday doorashooyinkii isdaba jooga ahaa ee ka qabsoomay Somaliland. kuwii Dawladaha Hoose . Madaxtooyada iyo Golaha Wakiilada . kuwaas oo si nabad iyo cadaalad ah u dhacay,
Waxaanu Cadeeyay Madaxweynuhu in uu aaminsan yahay in doorashooyinka soo socdaana ay sidaa si leeg u dhici doonaan .
ugu danbayntii waxa uu Madaxweynuhu uu uga mahad naqay Wadamada Midowga Yurub taageerada ay ka siiyaan Somaliland Mashaariicda kala duwan ee ay ka hir galiyeen dalka Somaliland, ‘’Waxaananu diyaar u nahay in Xukuumad ahaan aanu sii xoojin doono geedi socodka Dimuqraadiyada , Xasiloonida iyo Nabada ay Somaliland ku caana maashay” ayuu ku soo gabo gabeeyay hadalkiisii Madaxweynuhu.
Mudane Georges Marc Andre Ergayga gaarka ah ee Midowga Yurub oo isna halkaa hadal kooban ka jeediyay waxa uu Somaliland ku amaanay xukuumad iyo shacbiga waxa ay qabsadeen siiba Arrimaha Nabada iyo dimuqraadiyada ka jirta Somaliland, isaga oo kula taliyay in ay halkaa ka sii wadaan siina xoojiyaan.
Mr Mark Andre waxa kale oo uu tibaaxay in ururka Midowga Yurub ay soo kordhin doonaan deeqda ay ku taageeraan Mashaariicda horumarinta ah ee ay ka hirgelin doonaan Somaliland shanta sanadood ee soo socda.
Mr Andre waxa kale oo uu u mahad naqay Madaxweynaha iyo Xukuumada Somaliland soo dhawaynta fiican ee uu kala kulmay Mudadii gaabnayd ee dalka joogay.
kulankaa dhex maray Maanta Madaxweynaha iyo Ergayga gaarka ah ee Midowga Yurub waxa kale oo goob joog ka ahaa Wasiirka Arrimaha Dibada Somaliland Mudane C/laahi Maxamed Ducaale.”

Ma jiraan warar madax bannaan oo laga helay kulankaas. Waxaase la filayaa in Ergeyga iyo Madaxweyne Riyaale ay isla soo qaadeen xadhiga siyaasiyiinta ururka Qaran oo hadda muddo 4 bilood ku dhow ku jira jeelka Mandheera, iyada oo Midowga Yurub oo ah deeqbixiyaha ugu weyn ee Somaliland ka caawiya Doorashooyinka iyo horumarinta dimuqraadiyadda ay walaac ka muujiyeen xadhigga siyaasiyiinta iyo suxufiyiinta ee ay xukuumadda Somaliland beryahan dambe caadaysatey, marar badanna ay ku baaqeen in xorriyaddooda loo soo celiyo siyaasiyiinta xidhan ee ururka Qaran.

Cabdirisaaq M. Dubbad, Somaliland.org, Hargeysa.

E-mail: dubad@Somaliland.com